قورعاستا 27 -شىلدەدەن باستاپ باگاجدى تاسىمالداۋ قۇنى وزگەرەدى
جەتىسۋ. KAZINFORM - «قورعاس» حالىقارالىق شەكارالىق ىنتىماقتاستىق ورتالىعىنىڭ باسشىلىعى باگاجدى تاسىمالداۋ تاريفىن 1 كەلىسى ءۇشىن 100 تەڭگەگە دەيىن كوتەرۋ تۋرالى شەشىم قابىلدادى.
ش ى ح و باسپا ءسوز قىزمەتىنىڭ حابارلاۋىنشا، مۇنداي شەشىم قورعاس اۋماعىندا باگاجدى تاسىمالداۋ قىزمەتىن كورسەتەتىن كومپانيالاردىڭ بىرنەشە رەت ءوتىنىشى نەگىزىندە قابىلدانعان.
«باگاجدى قابىلداۋ/بەرۋ بويىنشا قىزمەت كورسەتۋ ساپاسىن جاقسارتۋ جانە تۋريستەردىڭ/كەلۋشىلەرگە ۇسىنىلاتىن قىزمەتتى جاقسارتۋ ماقساتىندا باگاجدىڭ 1 كەلىسى ءۇشىن باگاجدى تاسىمالداۋ تاريفىن 100 تەڭگەگە دەيىن ارتتىرۋ تۋرالى شەشىم قابىلداندى. تاريف 2024 -جىلدىڭ 27-شىلدەسىنەن باستاپ باگاجدى تاسىمالداۋشىلارمەن قوسىمشا كەلىسىمگە قول قويىلعاننان كەيىن كۇشىنە ەنەدى»، - دەلىنگەن حابارلامادا.
ايتا كەتەيىك، قازىرگى ۋاقىتتا جۇك تاسىمالداۋدىڭ كەلىسى 80 تەڭگە. بۇل - قازاقستان مەن قىتاي اراسىنداعى ساۋدا-ەكونوميكالىق ءوزارا ءىس-قيمىلدىڭ نەگىزگى نۇكتەسى. ىنتىماقتاستىق ورتالىعىنا كىرىپ-شىعاتىن ەكى ەلدىڭ ساياحاتشىلارى نەگىزىنەن ترانسشەكارالىق تۋريزم جانە شوپپينگپەن اينالىسادى.
وسىعان دەيىن قازاقستان-قىتاي شەكاراسىنداعى «قورعاس» ىنتىماقتاستىق ورتالىعى 24 ساعات جۇمىس ىستەۋى مۇمكىن ەكەنى تۋرالى جازىپ ەدىك.
قازاقستان-قىتاي شەكاراسىندا ورنالاسقان «قورعاس» ىنتىماقتاستىق ورتالىعىنا كەلۋشىلەر سانى ارتتا ءتۇستى. بۇل قازاقستان مەن قىتاي اراسىنداعى ساۋدا-ەكونوميكالىق ءوزارا ءىس-قيمىلدىڭ نەگىزگى نۇكتەسى. ىنتىماقتاستىق ورتالىعىنا كىرىپ-شىعاتىن ەكى ەلدىڭ ساياحاتشىلارى نەگىزىنەن ترانسشەكارالىق تۋريزم جانە شوپپينگپەن اينالىسادى.
قىتاي حالىق رەسپۋبليكاسىمەن ءوزارا ءتيىمدى ساۋدا- ەكونوميكالىق قارىم-قاتىناس ورناتۋ - قازاقستاننىڭ سىرتقى ەكونوميكالىق جالپى دامۋ ستراتەگياسىنىڭ باستى باعىتتارىنىڭ ءبىرى. «قورعاس» حالىقارالىق شەكارالىق ىنتىماقتاستىق ورتالىعىنىڭ جالپى اۋماعى - 600 گەكتار. ونىڭ 185 گەكتارى قازاقستانعا، 343 گەكتارى قىتايعا تيەسىلى.
قازاقستان مەن قىتاي شەكاراسىنداعى باقىلاۋ بەكەتى تاڭعى ساعات 07:00-دە اشىلىپ، كەشكى 18:00-دە جابىلادى. جاقىندا 24 ساعات جۇمىس ىستەۋى مۇمكىن. كەز كەلگەن ۋاقىتتا ءارى- بەرى وتۋگە ەش كەدەرگى جوق. بۇل «قورعاس» شەكاراسىنداعى كەشكى بازاردى دامىتادى.
«قازىر قازاقستاننان كەلەتىن تۋريستەر كوبەيدى. بيىل كەلۋشىلەر سانى بويىنشا جاڭا رەكورد ورناتتىق. ءبىر كۇندە 18 مىڭ ادامدى قابىلدادىق. قازاقستان مەن قىتاي تاۋلىك بويى جۇمىس ىستەۋدى قولعا الماق. قازىر بۇل ماسەلەمەن ەكى ءوڭىردىڭ بيلىگى اينالىسىپ جاتىر»، - دەيدى «قورعاس» ح ش ى و ساۋدا-ساتتىق دەپارتامەنتىنىڭ باسشىسى ما لي.
ايتۋىنشا، قورعاس تەك ساۋدا ورتالىعى عانا ەمەس، سونىمەن قاتار مادەني- ويىن-ساۋىق ورتالىعىنا اينالاتىنىن تىلگە تيەك ەتتى.
«جاقىندا «قىتاي مادەني- ورتالىعىندا» ەكى ەل ونەرپازدارىنا ارنالعان ءىس- شارا ۇيىمداستىرماقپىز. كەلەر جىلى وسى ايماقتا بالالارعا ارنالعان «Disneyland» ورتالىعىن سالامىز»، - دەدى ول.
بۇگىندە قازاقستان اۋماعىنا ءبىرىنشى كەزەكتە قوناق ۇيلەر سالىنۋ جوسپارلانعان. سودان سوڭ قويما، ءىرىلى-ۇساقتى زاۋىتتار اشىلادى.
اۆتور
الما مۇقانوۆا
