قۇرىلتايدىڭ ءار دەپۋتاتىنا بەلگىلى ءبىر ءوڭىر بەكىتىلەدى

— قۇرىلتاي رەگلامەنتىنىڭ 8-بابىندا سەسسيا ىشىندە وڭىرلەرگە كەمىندە 2 ساپار بولۋى كەرەكتىگى جازىلعان. دەمەك، قىركۇيەكتىڭ باسىنان ماۋسىم ايىنا دەيىن ءار دەپۋتات كەمىندە 1 رەت وڭىرلەرگە ساپار جاسايدى، — دەدى ول.

ونىڭ مالىمەتىنشە، جوعارى زاڭ شىعارۋشى ورگانعا وتكەن پارتيالار دەپۋتاتتارىن وڭىرلەرگە بولەدى. بۇل جايىندا اقپارات حالىققا جەتكىزىلەدى.

— تۇرعىندار قاي دەپۋتاتتىڭ قاي وڭىرگە بەكىتىلگەنىنەن حاباردار بولادى، — دەدى كونستانتين پەتروۆ.

ول قۇرىلتاي دەپۋتاتتارىنىڭ وڭىرلەرگە ساپارى جاريا تۇردە جۇرگىزىلەتىنىن ايتتى.

— ارينە، كەزدەسۋلەر ءتۇرلى فورماتتا بولادى. جەكە قابىلداۋلار دا، ەڭبەك ۇجىمدارىمەن كەزدەسۋلەر دە ۇيىمداستىرىلادى. ەشقانداي شەكتەۋ جوق، — دەدى قۇرىلتاي دەپۋتاتى.

ايتا كەتەيىك، جوعارى زاڭ شىعارۋشى ورگاننىڭ بۇگىنگى وتىرىسىندا قۇرىلتاي رەگلامەنتى بەكىتىلدى. قۇجاتتا دەپۋتاتتاردىڭ پرەمەر- مينيسترگە، ۇكىمەت مۇشەلەرىنە، ءبىرقاتار باسقا مەملەكەتتىك ورگانداردىڭ باسشىلارىنا جانە ءوڭىر اكىمدەرىنە ساۋال جولداۋى قۇقىعى كوزدەلگەن.