قۇندى داعدىلارى بار ماماندارعا ەرەكشە ۆيزا بەرىلمەك
استانا. KAZINFORM - قۇندى داعدىلارى بار شەتەلدىك ماماندارعا قازاقستاندا تۇراقتى تۇرۋعا قۇقىق بەرەتىن В9 ۆيزاسىن ەنگىزۋ جۇمىسى جۇرگىزىلىپ جاتىر.
بۇل تۋرالى سەنات دەپۋتاتتارىنىڭ ساۋالىنا پرەمەر- ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.
«سىرتقى ىستەر مينيسترلىگى قازاقستان ءۇشىن قۇندى داعدىلارى بار ماماندارعا تۇراقتى تۇرۋعا قۇقىق بەرەتىن В9 ۆيزاسىن ەنگىزۋ بويىنشا جۇمىس جۇرگىزىپ جاتىر. تۇزەتۋلەر زاڭ جوباسى شەڭبەرىندە كوزدەلگەن. قابىلدانىپ جاتقان ءىس- شارالار تەحنولوگيالاردىڭ ترانسفەرتىن جانە ۇلتتىق كادرلاردى دايارلاۋدى قامتاماسىز ەتەتىن كاسىبي بىلىكتىلىگى جوعارى دارەجەسى بار تاپشى كاسىپتەر بويىنشا شەتەلدىك ماماندارعا باسا نازار اۋدارا وتىرىپ، بىلىكتى ەڭبەك ميگرانتتارىن قازاقستانعا تارتۋعا مۇمكىندىك بەرەدى»، - دەپ اتاپ وتەدى ۆيتسە-پرەمەر جاۋابىندا.
تامارا دۇيسەنوۆانىڭ اتاپ وتۋىنشە، ەل ەكونوميكاسىنا سۇرانىسقا يە مامانداردى تارتۋ ماسەلەلەرى ۇكىمەتتىڭ ەرەكشە باقىلاۋىندا.
اۆتور
مارلان جيەمباي
