قۇلسارى حالقىنا ءۇي ساتىپ الۋعا، جوندەۋگە 70 ميلليارد تەڭگە اۋدارىلعان
اتىراۋ. KAZINFORM - اتىراۋ وبلىسىنداعى قۇلسارى قالاسىنىڭ تۇرعىندارىنا سۋ تاسقىنىنان بۇلىنگەن تۇرعىن ءۇيىن جوندەۋگە، جاڭا باسپانا سالىپ الۋعا 70 ميلليارد تەڭگە اۋدارىلعان.
قۇلسارى-جىلىوي اۋدانىنىڭ ورتالىعى بولعانىمەن، 2001 -جىلى مونوقالا مارتەبەسى بەرىلگەن. ساۋىردە جەم وزەنىنىڭ ارناسىنان اسقان تاسقىن سۋ مونوشاھارعا كىرگەن ەدى.
سونىڭ سالدارىنان تۇرعىن ءۇي، الەۋمەتتىك جانە كاسىپكەرلىك نىساندار ءبۇلىندى.
اتىراۋ وبلىسى اكىمىنىڭ باسپا ءسوز حاتشىسى رۋسلان جۇماعازييەۆتىڭ مالىمەتىنە سۇيەنسەك، تاۋەلسىز تەحنيكالىق ساراپشىلاردىڭ قورىتىندىسىمەن تاسقىن سۋدان 2650 ءۇيدىڭ بۇلىنگەنى ناقتىلانعان.
«وسى كەزگە دەيىن جىلىوي اۋدانىنداعى قۇلسارى قالاسىندا تاسقىن سۋدان باسپاناسى زارداپ شەككەن 2633 تۇرعىن وتەماقى الۋ ءۇشىن كەلىسىمشارتقا قول قويدى. ولاردىڭ بارىنە دە وتەماقى تولەندى. ونىڭ ىشىندە تاۋەلسىز تەحنيكالىق ساراپشىلاردىڭ قورىتىندىسىنا سايكەس ءۇيى اپاتتى دەپ تانىلعان 1453 تۇرعىن باسپانا ساتىپ الۋعا وتەماقى الدى. وتەماقى تۇرعىنداردىڭ جەكە ەسەپشوتىنا اۋدارىلدى. ەندى ولار اتىراۋ وبلىسىنىڭ اۋماعىنداعى قالا مەن ەلدى مەكەندەرىنەن تۇرعىن ءۇي ساتىپ الۋىنا مۇمكىندىگى بار. قۇلسارى تۇرعىندارىنا تۇرعىن ءۇي ساتىپ، نە بۇلىنگەن باسپاناسىن قالپىنا كەلتىرۋ ءۇشىن جوندەۋ جۇرگىزۋ ماقساتىندا بەرىلگەن وتەماقىنىڭ كولەمى 70 ميلليارد تەڭگەنى قۇرادى. وتەماقى جەرگىلىكتى بيۋدجەتتەن، ءىرى كومپانيالار مەن دەمەۋشىلەردىڭ قارجىسى ەسەبىنەن اۋدارىلدى»، - دەپ ءمالىم ەتتى رۋسلان جۇماعازيەۆ.
سونداي- اق، قۇلسارى قالاسىندا تۇراتىن 215 كاسىپكەر تاسقىن سۋدان زارداپ شەككەن نىساندار ءۇشىن وتەماقى الۋعا ءوتىنىشى بەرگەن.
بۇلىنگەن نىساندارعا ساراپتاما جۇرگىزىلگەننەن كەيىن كاسىپكەرلەرگە 2,1 ميلليارد تەڭگە مولشەرىندە وتەماقى تولەنگەن.
«جىلىوي اۋدانىنداعى سۋ تاسقىنى كەزىندە تۇرعىندار يەلىگىندەگى 1082 ءتورت تۇلىك، 532 ءۇي قۇسى ولگەنى انىقتالدى. وسىعان بايلانىستى تۇرعىنداردان وتەماقى الۋعا 150 ءوتىنىش ءتۇستى. سوعان سايكەس تۇرعىندارعا ولگەن مال مەن قۇس 212,6 ميلليون تەڭگە وتەماقى تولەندى»، - دەدى رۋسلان جۇماعازيەۆ.
ەسكە سالا كەتەلىك، بۇعان دەيىن سۋ باسقان قۇلسارى قالاسىندا 100 ءۇيدىڭ قۇرىلىسى قالاي ءجۇرىپ جاتقانىن جازعان ەدىك.
اۆتور
جولداسبەك شوپەعۇل
