قازاقستاننىڭ سولتۇستىگىن گازداندىرۋ ماسەلەسى قالاي شەشىلىپ جاتىر
پەتروپاۆل. KAZINFORM - ەلدىڭ سولتۇستىگىن گازداندىرۋ ماسەلەسى بىرنەشە جىلدان بەرى كوتەرىلىپ كەلەدى. بۇل - تۇرعىنداردىڭ ءومىر ساپاسىن ارتتىرىپ قانا قويماي، ەكولوگيالىق جاعىنان دا ءتيىمدى بولماق.
ەنەرگەتيكا مينيسترلىگىنىڭ مالىمەتىنشە، قازىرگى تاڭدا بۇل ماسەلەنى شەشۋدىڭ ەكى نەگىزگى جولى قاراستىرىلىپ وتىر - وتاندىق گاز رەسۋرستارى مەن رەسەيدەن گاز يمپورتتاۋ.
سونىڭ ءبىرى - «سارى ارقا» جوباسى. بۇل ماگيسترالدى گاز قۇبىرىنىڭ 2 جانە 3 كەزەڭدەرى اقمولا مەن سولتۇستىك قازاقستان وبلىستارىن گازداندىرۋدى كوزدەيدى.
الايدا بۇل كەزەڭدەردى جۇزەگە اسىرۋ «بەينەۋ - بوزوي - شىمكەنت» ماگيسترالدى گاز قۇبىرىنىڭ قۋاتىن ارتتىرۋعا تىكەلەي بايلانىستى.
ەنەرگەتيكا مينيسترلىگىنىڭ اقپاراتىنا سايكەس، «QazaqGaz» ۇ ك» ا ق 2026 -جىلدىڭ سوڭىنا دەيىن قاتارلىق ينۆەستورمەن بىرلەسىپ، «بەينەۋ - بوزوي - شىمكەنت» گاز قۇبىرىنىڭ جەلىلىك بولىگىندە قۇرىلىس- مونتاجداۋ جۇمىستارىن باستاۋدى جوسپارلاپ وتىر.
ياعني، «سارى ارقا» جوباسىنىڭ پەتروپاۆلعا دەيىن كەلۋى بۇل جۇمىستاردىڭ تابىستى جۇزەگە اسۋىنا تاۋەلدى.
- سونداي-اق، سولتۇستىك جانە شىعىس وڭىرلەردى گازداندىرۋ ماسەلەسى بويىنشا كەلىسسوز رەسەيمەن دە بەلسەندى تۇردە جۇرگىزىلىپ جاتىر. قازاقستان مەن رەسەي اراسىندا 10 ميلليارد تەكشە مەتر كولەمىندە گاز جەتكىزۋ مۇمكىندىگى قاراستىرىلىپ وتىر. بۇل باعىتتا كەلىسسوزدەر اياقتالعان جوق. قازىرگى تاڭدا گازدىڭ باعاسى مەن جەتكىزۋ شارتتارى كەلىسىلىپ جاتىر. قۇبىر تارتۋ جۇمىستارى تاراپتار اراسىنداعى كەلىسىمدەر تولىق بەكىتىلگەن سوڭ عانا باستالماق. قازاقستاندىق تاراپ دايىن، تەك رەسەيدىڭ ناقتى جاۋابىن كۇتىپ وتىر، - دەلىنگەن ۆەدومستۆو اقپاراتىندا.
وتكەن جىلدىڭ قورىتىندىسى بويىنشا، ەل حالقىنىڭ %62,4 نەمەسە 12,6 ميلليون ادام تابيعي گازعا قول جەتكىزگەن. بيىل دا وڭىرلەردى گازداندىرۋ جۇمىستارى جالعاسادى. رەسپۋبليكالىق بيۋدجەتتەن 65,9 ميلليارد تەڭگە ءبولىنىپ، 45 جوبا جۇزەگە اسىرىلماق.
بۇل جوبالار اياسىندا ەلىمىزدىڭ 13 وڭىرىندەگى ءبىرقاتار ەلدى مەكەنگە تابيعي گاز جەتكىزۋ جوسپارلانعان. ماسەلەن، اقمولا وبلىسىندا – 1، اتىراۋدا – 1، جامبىلدا – 17، جەتىسۋدا - 21 ەلدى مەكەن قامتىلادى. ناتيجەسىندە وسى جىلى 7 وبلىستا 36 مىڭنان استام ادام گاز جەلىسىنە قوسىلادى.
رەسپۋبليكالىق بيۋدجەتتەن بولەك «سامۇرىق- قازىنا» ا ق قاراجاتى دا وسى ماقساتقا باعىتتالماق. بۇل جوبالاردىڭ ناتيجەسىندە قوسىمشا 218 مىڭ ادام تابيعي گازعا قول جەتكىزەتىن بولادى.
وسىلايشا پايدالانۋشىلار سانى 12,8 ميلليون ادامعا جەتپەك. ەنەرگەتيكا مينيسترلىگى گازداندىرۋ دەڭگەيىن 2030 -جىلعا قاراي 65 پايىزعا جەتكىزۋدى كوزدەپ وتىر.
بۇعان دەيىن پرەمەر- مينيستر ولجاس بەكتەنوۆ ەلدىڭ سولتۇستىگىن گازداندىرۋ ءۇشىن «سارى ارقا» قۇبىرىنىڭ 2,3-كەزەڭدەرى سالىناتىنىن ايتقان ەدى.
اۆتور
اقەركە داۋرەنبەك قىزى
