قازاقستاننىڭ ۇلتتىق برەندى - اپورت الماسى قايتا جاڭعىرتىلماق
استانا. KAZINFORM - ق ر پرەزيدەنتى جانىنداعى ۇلتتىق عىلىم اكادەمياسى العاش رەت «Garden Day - Aport» اتتى باقشا كۇنىن وتكىزدى.
ءىس-شارا قازاق جەمىس-كوكونىس شارۋاشىلىعى عىلىمي- زەرتتەۋ ينستيتۋتىنىڭ «تالعار» ايماقتىق فيليالىنىڭ بازاسىندا ۇيىمداستىرىلدى. بۇل تۋرالى ق ر ا ش م باسپا ءسوز قىزمەتى ءمالىم ەتتى.
وعان ق ر اۋىل شارۋاشىلىعى ۆيتسە-ءمينيسترى ەربول تاسجۇرەكوۆ، الماتى وبلىسى اكىمىنىڭ ورىنباسارى نۇرجان قۇدايبەرگەنوۆ، عىلىمي-زەرتتەۋ ينستيتۋتتارىنىڭ جەتەكشىلەرى، اگروبيزنەس وكىلدەرى، تۇركيا، پولشا جانە بولگاريادان كەلگەن عالىمدار قاتىستى.
پرەزيدەنت تاپسىرماسى بويىنشا قازاقستاندا ۇلتتىق برەند - اپورتتى قايتا جاڭعىرتۋ شارالارى قابىلدانىپ جاتىر.
«قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ تالعار فيليالىندا 5 گەكتار جەرگە الماتى اپورتى مەن قان قىزىل اپورتى سورتتارىنىڭ انالىق كوشەتتەرى وتىرعىزىلعانىن حابارلادى. كوشەتتەر اپورتتىڭ 115 كلونىنان دامدىك قاسيەتتەرى مەن اۋرۋعا توزىمدىلىگىنە قاراي ىرىكتەلگەن. سونىمەن قاتار، گەنەتيكالىق تالداۋ ارقىلى اپورتپەن ۇيلەسىمدى سيۆەرس جابايى الماسى سورتتارى ىرىكتەلىپ، تۇقىمدىق باق سالىندى»، - دەلىنگەن حابارلامادا.
ەسكەرتە كەتەيىك، 2023 -جىلى قازاقستاندا 251,5 مىڭ توننا الما ءوسىرىلدى، ونىڭ 98,5 مىڭ تونناسى يمپورتتالعان. ونەركاسىپتىك باقتاردا 194,1 مىڭ توننا الما ءوسىرىلدى. تەك وسى جىلدىڭ العاشقى جارتىسىندا 94 مىڭ توننا الما يمپورتتالعان.
اۋىل شارۋاشىلىعى ۆيتسە-ءمينيسترى ەربول تاسجۇرەكوۆ جەمىس-جيدەك شارۋاشىلىعىن دامىتۋدىڭ ەلدىڭ ازىق-تۇلىك قاۋىپسىزدىگى مەن ەكونوميكاسى ءۇشىن ماڭىزى زور ەكەنىن اتاپ ءوتىپ، باعبانداردى قولداۋ شارالارى تۋرالى ايتتى.
ءىس-شاراعا قاتىسۋشىلار جەمىس-جيدەك شارۋاشىلىعى سالاسىن دامىتۋ جوسپارلارى مەن پەرسپەكتيۆالارى، اتاپ ايتقاندا، اپورتتى قايتا جاڭعىرتۋ جانە ساقتاۋ تۋرالى حاباردار بولدى، سونداي-اق ءونىمنىڭ ەكولوگيالىق قاۋىپسىزدىگىن جانە توپىراق قۇنارلىلىعىن قالپىنا كەلتىرۋدى ەسكەرە وتىرىپ، جەمىس-جيدەك داقىلدارىن ءوسىرۋدىڭ پەرسپەكتيۆالى تەحنولوگيالارى بويىنشا عىلىمي-پراكتيكالىق ۇسىنىستار الدى.
اۆتور
باقىتگۇل اباي قىزى
