قازاقستاننىڭ التىن قورى: وعان كىم جاۋاپتى

قازاقستاندا قارجى نارىعىن، ەكونوميكانى تۇراقتاندىرۋشى ءرولىن وينايتىن مەملەكەتتىك التىن قورى بار. وعان ۇلتتىق بانك جاۋاپتى. بىزدە قازىر 19,76 ميلليارد دوللارعا باعالاناتىن التىن ساقتاۋلى.

ول التىن- ۆاليۋتا رەزەرۆىنىڭ ىشىنە كىرەدى. ءيا، بۇل التىندار بىزدە فيزيكالىق پىشىندە، ياعني مەتال تۇرىندە ارنايى قويمالاردا ساقتالادى. قازاقستان بۇل التىنداردى كوبىنە سىرتتان ساتىپ المايدى. 1994-جىلدان بەرى جۇمىس ىستەيتىن ەرەجە بويىنشا، ەلىمىزدە التىن وندىرەتىن كومپانيالار ءوز التىنىن ۇلتتىق بانك تالاپ ەتسە، الدىمەن ۇلتتىق بانككە ساتۋى ءتيىس. سول سەبەپتى، قويمادا جاتقان التىننىڭ بارلىعى دەرلىك - ءوز جەرىمىزدە وندىرىلگەن باعالى مەتال.

ايتپاقشى، التىننىڭ دا مينۋستارى بولادى. ماسەلەن، التىن ساقتاۋشى ءرول اتقارىپ، وسىمگە قىزمەت ەتپەيدى. دەمەك، التىن ساقتاۋ - ءوز اقشاڭدى ەش كوبەيتپەي، تەك سول كۇيى ۇستاپ وتىرۋ دەگەندى بىلدىرەدى. قازاقستان ۇزاق جىلدار بويى وسى جولمەن ءجۇرىپ كەلدى. ءبىراق سوڭعى 2 جىلدا ءبىز ءوز ستراتەگيامىزدى وزگەرتە باستادىق، ياعني ۇلتتىق بانك رەزەرۆىندەگى جانە ۇلتتىق قورداعى التىننىڭ ۇلەسىن ازايتىپ، ءوسىمدى كوبىرەك بەرەتىن قۇندى قاعازدار ۇلەسىن ارتتىرۋدى كوزدەپ وتىرمىز. سوندا ءبىز ءوز جيناعىمىزدى ءتيىمدى پايدالاناتىن بولامىز.

وسى ۇستانىمعا ساي، ۇلتتىق بانك 2022 -جىلى سىرتقى نارىققا 120 توننا التىن ساتىپ، ودان 7 ميلليارد دوللار الدى. وسىنىڭ ارقاسىندا التىننىڭ رەزيەۆتەردەگى ۇلەسى 58 پايىزعا دەيىن تومەندەگەن ەدى. بيىل ۇلتتىق بانك جىلدىڭ ءبىرىنشى جارتىسىندا تاعى 67 توننا التىن ساتتى دا، وسى ۇلەستى 50 پايىزعا دەيىن ءتۇسىرۋدى جوسپارلاپ وتىر. سوندىقتان سىرتقى نارىقتاردا التىن ساتۋىن جالعاستىرا بەرەدى.

بۇگىندە قازاقستاندا قانشا التىن بار؟

ەلىمىزدە قازىر 310 توننا مەملەكەتتىك التىن بار. ونىڭ كولەمى بويىنشا ءبىز الەمدەگى العاشقى 20 مەملەكەتتىڭ تىزىمىنە عانا كىرەمىز. ءبىرىنشى ورىن ا ق ش- قا تيەسىلى. سونداي- اق، گەرمانيا، يتاليا مەن فرانسيانىڭ ورتالىق بانكتەرى ەڭ كوپ التىن ۇستاپ وتىرعان مەملەكەتتەر تىزىمىنە كىرەدى.

اۆتور
گۇلنۇر عازيز قىزى