قازاقستاندىق تاۋار وندىرۋشىلەرگە 30 پايىزدىق مىندەتتى اۆانس تولەنەدى

استانا. KAZINFORM - قارجى ءمينيسترى ءمادي تاكيەۆ ۇكىمەت وتىرىسىندا مەملەكەتتىك ساتىپ الۋ قاعيداتتارىنا ەنگىزىلگەن وزگەرىستەردىڭ وتاندىق ءوندىرىستى قولداۋعا تيگىزەتىن سەپتىگى تۋرالى مالىمەت بەردى.

«قولدانىستاعى مەملەكەتتىك ساتىپ الۋ جانە كۆازيمەملەكەتتىك سەكتوردىڭ ساتىپ الۋى قاعيدالارىنا وزگەرىستەر ەنگىزىلدى. وندا مىنالار كوزدەلەدى:

- تاۋارلاردى، جۇمىستار مەن قىزمەتتەردى باسىمدىقپەن وتاندىق تاۋار وندىرۋشىلەر تىزىلىمىندەگى ءونىم بەرۋشىلەردەن ساتىپ الۋ؛

- وتاندىق تاۋار وندىرۋشىگە %30 مولشەرىندە مىندەتتى اۆانس تولەنەدى، بۇل ءبىزدىڭ ءونىم بەرۋشىلەرگە شارتتىق مىندەتتەمەلەردى ۋاقتىلى جانە تيىسىنشە ورىنداۋعا مۇمكىندىك بەرەدى»، - دەدى ۆەدومستۆو باسشىسى.

سونداي-اق، ول ايىپپۇلداردى ازايتۋ جاعىندا دا وڭ وزگەرىس بار ەكەنىن ايتتى.

«وتاندىق تاۋار وندىرۋشىلەر ءۇشىن تۇراقسىزدىق ايىبىن %10- دان %3- عا دەيىن تومەندەتۋ جولعا قويىلدى. بۇل دا ەلەۋلى قولداۋ شاراسى بولىپ ەسەپتەلەدى. كۆازيمەملەكەتتىك سەكتوردىڭ ساتىپ الۋلارىندا وففتەيك-كەلىسىمشارتتاردى ءبىر كوزدەن ساتىپ الۋ ءتاسىلى ارقىلى ىسكە اسىرۋ كوزدەلىپ وتىر. اتالعان شارالار وتاندىق ءوندىرىستى ىنتالاندىرۋعا جانە رەتتەلەتىن ساتىپ الۋلارداعى قازاقستاندىق قامتۋ ۇلەسىن قامتاماسىز ەتۋگە باعىتتالعان»، - دەدى ءمادي تاكييەۆ.

اۆتور

ەسىمجان ناقتىباي