قازاقستانداعى شەتەلدىك ج و و فيليالدارىنا قالاي تۇسۋگە بولادى

استانا. KAZINFORM – ق ر عىلىم جانە جوعارى ءبىلىم ءمينيسترى ساياسات نۇربەك قازاقستاندا شەتەلدىك ج و و فيليالدارىنا ءتۇسۋ تالاپتارى تۋرالى ايتىپ بەردى.

«مۇنداعى ماڭىزدى نارسە - تالاپكەرلەردى ىرىكتەۋدى شەتەلدىك فيليالداردىڭ ءوزى جۇرگىزەدى، ءبىز وعان رۇقساتىمىزدى بەردىك. ويتكەنى ءار ۋنيۆەرسيتەتتىڭ ستۋدەنت قابىلداۋداعى ءوز تالاپتارى بولادى، ءتىل ءبىلىمىن دالەلدەيتىن IELTS سەرتيفيكاتى سۇرالادى، ءبىز وعان ارالاسا المايمىز. ءبىر عانا جەڭىلدىك: العاشقى جىلى تىلگە قويىلاتىن تالاپتاردى تومەندەتتىك، ويتكەنى وقۋعا تۇسكەندەردىڭ بارلىعى الدىمەن foundation - دايىندىق كۋرسىنان وتەدى. ولار جىل بويى ءتىل، اكادەميالىق جازۋ، زەرتتەۋ ادىستەرىن قارقىندى ۇيرەنەدى. باكالاۆرياتتىڭ ءبىرىنشى جىلىن باستاۋ ءۇشىن ءتىل دەڭگەيىن قاجەتتى دەڭگەيگە كوتەرەتىن ۋاقىت بار»، - دەپ ءتۇسىندىردى س. نۇربەك ورتالىق كوممۋنيكاتسيالار قىزمەتىندە.

ونىڭ ايتۋىنشا، شەتەلدىك ج و و فيليالدارىنىڭ وقۋعا قابىلداۋ مەرزىمدەرى دە باسقاشا، شاقىرۋ ناۋقانى اقپان ايىنان بەرى جۇرگىزىلىپ كەلەدى. سونىمەن قاتار، مەملەكەتتىك گرانتتار دا بولىنەدى.

«وسى فيليالدارعا تۇسەتىن بارلىق ستۋدەنتتەرگە ازىرشە گرانتتار بەرىلەدى. بۇل فيليالدى قولداۋ ءۇشىن قاجەت»، - دەدى مينيستر.

وقىتۋشىلار اراسىندا مىندەتتى تۇردە حالىقارالىق ماماندار بولادى.

بۇدان باسقا، «بولاشاق» باعدارلاماسىنىڭ تۇلەكتەرى، شەتەلدە ءبىلىم العان قازاقستاندىقتار بەلسەندى تۇردە تارتىلادى. بۇل رەتتە جەرگىلىكتى سەرىكتەس ج و و ءوز وقىتۋشىلارىن شەتەلدىك كەڭسەگە وقۋعا جىبەرەدى.

مىسالى، قازىر ەدينبۋرگتە 16 قازاقستاندىق وقىتۋشى ءبىلىم الۋدا. بۇل قوسىمشا پاندەردى جەرگىلىكتى رەسۋرستار ەسەبىنەن وقىتۋ ءۇشىن جاسالىپ وتىر.

«شەتەلدىك سەرىكتەس ساپا ستاندارتىنا كەپىلدىك بەرەدى جانە بارلىق نەگىزگى پاندەردى ولاردىڭ ۇزدىك وقىتۋشى- پروفەسسورلارى وقىتادى»، - دەپ اتاپ ءوتتى ساياسات نۇربەك.

اۆتور

ايجان سەرىكجان قىزى