قازاقستاندا تەلەفون نومىرلەر eGov ارقىلى بەرىلۋى مۇمكىن

استانا. KAZINFORM - قازاقستاندا تەلەفون نومىرلەرىن eGov ارقىلى بەرۋ تۋرالى ۇسىنىس بار. وسى ورايدا الاياقتىقتاردىڭ ارەكەتىنە توسقاۋىل قويۋ قادامدارى ءتيىمدى بولادى.

بۇل تۋرالى ق ر سيفرلىق دامۋ، يننوۆاتسيالار جانە ايەروعارىش ونەركاسىبى ۆيتسە-ءمينيسترى اسحات ورازبەك ءمالىم ەتتى.

بۇگىن ءماجىلىستىڭ جالپى وتىرىسىندا اسحات راقىمجانوۆ قازاقستان حالقى مالىمەتتەرىنىڭ قۇپيالىعىن ساقتاۋ، الاياقتاردان قورعاۋ ماسەلەسىنە قاتىستى سۇراق قويدى.

ءوز كەزەگىندە ا. ورازبەك مينيسترلىك SIM- كارتالاردى ساتۋدا ءتيىستى شەكتەۋ ەنگىزۋ جوسپارلانىپ وتىرعانىن ايتتى.

«الاياقتار نەگىزىنەن WhatsApp جانە الەۋمەتتىك جەلىلەر ارقىلى ارەكەت ەتەدى، ال ۇيالى بايلانىس وپەراتورلارى WhatsApp-تى بۇعاتتاي المايدى. قازىرگى كەزدە وپەراتورلار SIM- كارتالار مەن نومىرلەردى بەرىپ جاتىر. الايدا بولاشاقتا ازاماتتار نومىرلەردى Egov.kz پورتالى ارقىلى الادى. سونىمەن قاتار، ءبىز ءبىر ادامنىڭ قولىندا بولاتىن SIM- كارتالاردىڭ سانىن شەكتەيمىز»، - دەدى ۆيتسە-مينيستر.

ونىڭ ايتۋىنشا، زاڭدى تۇلعالار جۇمىس بابىندا پايدالانۋعا ساتىپ الاتىن SIM- كارتالارعا قاتىستى ناقتى دەرەكتەردى ۇسىنادى. سەبەبى قازىر نومىرلەر باقىلاۋسىز وتكىزىلىپ جاتىر.

«تاياۋدا مينيسترلىك وسىنداي زاڭنامالىق باستامالارمەن پارلامەنتكە كەلەدى»، - دەدى اسحات ورازبەك.

بۇدان بۇرىن حابارلانعانداي، قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا الاياقتاردىڭ تۇزاعىنا تۇسپەۋ ءۇشىن نە ىستەۋ كەرەك ەكەنىن ءتۇسىندىردى.

قازىر الاياقتار نەگىزىنەن الەۋمەتتىك جەلىلەر، مەسسەندجەرلەر ارقىلى حالىقتى الداپ جاتىر.

اۆتور

رۋسلان عابباسوۆ