قازاقستاندا قىزىلشا وڭدەيتىن ءىرى زاۋىت سالىنادى - جوبا قۇنى 200 ميللين دوللار
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ تۇركيالىق Safi Holding كومپانياسىنىڭ باس اتقارۋشى ديرەكتورى سافي اتاكانمەن كەزدەسۋ وتكىزدى.
كەلىسسوز بارىسىندا قازاقستان اۋماعىندا قانت زاۋىتىن سالۋ ماسەلەلەرى تالقىلاندى.
تۇركياداعى ەڭ ءىرى ونەركاسىپتىك حولدينگتەردىڭ ءبىرى سانالاتىن Safi Holding جىلىنا 140 مىڭ تونناعا دەيىن قانت وندىرەتىن جوعارى تەحنولوگيالىق زاۋىت سالۋ جوباسىن جۇزەگە اسىرۋعا مۇددەلى.
زاۋىتتىڭ قىزىلشا وڭدەۋ قۋاتى - 1 ميلليون توننا. جوبانىڭ بولجامدى ينۆەستيتسيا كولەمى - 150- 200 ميلليون ا ق ش دوللارى. قازىرگى ۋاقىتتا ينۆەستورلار زاۋىتتى ورنالاستىرۋ ءۇشىن قولايلى وڭىرلەردى قاراستىرۋدا. ورنالاساتىن ورىندى تاڭداۋداعى باستى فاكتورلار - قانت قىزىلشاسىن وسىرۋگە جارامدى ەگىستىك جەر كولەمىنىڭ جەتكىلىكتىلىگى جانە ينفراقۇرىلىممەن قامتاماسىز ەتىلۋى.
اۋىل شارۋاشىلىعى مينيسترلىگى جوبانى ىسكە اسىرۋ ءۇشىن تولىق قولداۋ كورسەتۋگە دايىن ەكەنىن، سونىڭ ىشىندە قولدانىستاعى زاڭناما اياسىندا مەملەكەتتىك قولداۋ شارالارىن ۇسىنۋعا ءازىر ەكەنىن راستادى.
- اتالعان جوبانى ىسكە اسىرۋدا جان-جاقتى قولداۋ كورسەتىلەدى، - دەپ اتاپ ءوتتى ايداربەك ساپاروۆ.
ءوز كەزەگىندە سافي اتاكان كورسەتىلگەن قىزىعۋشىلىق ءۇشىن العىسىن ءبىلدىرىپ، قازاقستاننىڭ قانت سالاسىن دامىتۋعا قولايلى اگروونەركاسىپتىك الەۋەتكە يە ەكەنىن اتاپ ءوتتى.
ايتا كەتەلىك مينيستر قانتپەن ىشكى قامتۋ جايلى سەنساتسيالىق بولجام ايتقان ەدى.
