قازاقستاندا قىتايدىڭ كەدەيلىكتى ازايتۋ تاجىريبەسى قولدانىلادى
استانا. KAZINFORM - «قارىزسىز قوعام» جوباسىنىڭ ساراپشىلارى قىتاي حالىق رەسپۋبليكاسىنا رەسمي ساپارمەن باردى جانە ونداعى كەدەيلىكتى ازايتۋ ورتالىعىنىڭ جۇمىس تاجىريبەسىمەن تانىستى.
قىتايداعى كەدەيلىكتى ازايتۋ ورتالىعى حالىقتىڭ از قامتىلعان توپتارىنىڭ ءال-اۋقاتىن جاقسارتۋعا باعىتتالعان ستراتەگيالاردى ازىرلەۋ مەن ەنگىزۋدە كوشباسشى سانالادى.
بۇل ورتالىق عىلىمي-زەرتتەۋ جۇمىستارىمەن بەلسەندى اينالىسادى، ءبىلىم باعدارلامالارىن ۇيىمداستىرادى جانە ميلليونداعان ادامدارعا ءومىر ءسۇرۋ جاعدايلارىن جاقسارتۋعا كومەكتەسكەن پراكتيكالىق باستامالاردى جۇزەگە اسىرادى.
بۇگىنگى تاڭدا قىتايداعى بارلىق كاسىپورىنداردىڭ %80- دان استامى جەكە مەنشىكتە، ولار جۇمىس ورىندارىنىڭ ەلەۋلى بولىگىن قامتاماسىز ەتەدى.
الايدا، تاجىريبە كورسەتكەندەي، بۇل ۇلكەن الەۋمەتتىك جىكتەلۋگە، حالىق تابىسىنداعى ۇلكەن الشاقتىققا اكەلۋدە.
«2016 -جىلى ق ح ر مەملەكەتتىك كەڭەسى «كەدەيلىكتى جويۋ باعدارلاماسىن» جاريالادى. سول جىلى Alibaba 20 مىڭنان استام Taobao اۋىلدىق قىزمەت كورسەتۋ ورتالىقتارىن اشتى. مۇنداي ورتالىقتاردا تۇرعىندار ەلەكتروندى ساۋدا الاڭىندا جۇمىس ىستەۋدى، ءوز ءونىمىن ساتۋ ءۇشىن ينتەرنەت-دۇكەن اشۋدى ۇيرەندى. 2017 -جىلدىڭ وزىندە ەلدە 9 ميلليوننان استام اۋىلدىق ونلاين-دۇكەندەر پايدا بولدى، 28 ميلليون جاڭا جۇمىس ورنى اشىلدى»، - دەيدى «قارىزسىز قوعام» جوباسىنىڭ اۆتورى، AMANAT پارتياسىنىڭ حاتشىسى ەلدار جۇماعازيەۆ.
وسىلايشا، كەدەي اۋداندارداعى ينفراقۇرىلىم دا ەداۋىر جاقسارعان: 1,1 ميلليون شاقىرىم جول قايتا جاڭارتىلدى، 35 مىڭ شاقىرىم تەمىرجول سالىندى، سۋمەن جابدىقتاۋدىڭ جالپى كولەمى 18,1 ميلليارد تەكشە مەترگە وسكەن.
ينفراقۇرىلىمدى دامىتۋ ميلليونداعان ادامداردى ەكونوميكالىق اينالىمعا تارتۋعا مۇمكىندىك بەردى.
قىتايداعى كەدەيلىكپەن كۇرەسۋدىڭ ەڭ ماڭىزدى ەرەكشەلىگى - ناقتىلىق پەن اتاۋلى سيپاتى.
كەدەيلەرگە كومەك كورسەتۋ جانە كەدەيلىكتى جويۋ ماقساتتارىن جۇزەگە اسىرۋعا اقپاراتتىق قولداۋ كورسەتۋ ءۇشىن كەدەيلىككە قارسى مەملەكەتتىك اقپاراتتىق پلاتفورما قۇرىلعان.
سوڭعى 10 جىلدا قىتايدا كەدەيلىككە قارسى الەۋمەتتىك باعدارلامالارعا 246 ميلليارد دوللار ينۆەستيتسيالاندى.
جىلدار بويعى كۇش-جىگەردەن كەيىن 2020 -جىلى كەدەيلىك شەگىنەن تومەن تۇرعان 100 ميلليون قىتايلىق اۋىل تۇرعىندارىنىڭ بارلىعى كەدەيلىكتەن ارىلدى، ال 832 ۋەزد بەن 128 مىڭ اۋىل كەدەيلەر تىزىمىنەن شىعارىلدى.
ايتا كەتەيىك، كەدەيلىكتى ازايتۋ ورتالىعىنان الىنعان ءبىلىم مەن تاجىريبە «قارىزسىز قوعام» جوباسى اياسىندا كەدەيلىكپەن كۇرەسۋدىڭ جاڭا ءتيىمدى ادىستەرىن ەنگىزۋگە كومەكتەسەدى.
«بۇل ءبىز ءۇشىن بۇرىن-سوڭدى بولماعان تاجىريبە بولدى جانە ونىڭ كەيبىر ەلەمەنتتەرىن «قارىزسىز قوعام» جوباسى اياسىندا ەنگىزۋگە تىرىسامىز. ءبىز تەك قارجىلىق ساۋاتتىلىقپەن عانا شەكتەلىپ قويماي، اۋىل تۇرعىندارىنا اۋىل شارۋاشىلىعى داقىلدارىن دۇرىس ءوسىرۋدى ۇيرەتە باستايمىز، ولارعا تاۋارلىق نەسيەلەر بەرىپ، مامانداردىڭ سۇيەمەلدەۋىن قامتاماسىز ەتەمىز. «اۋىلدا جاسالعان» تۇتىنۋ كووپەراتيۆىنىڭ قىزمەتى ارقىلى جەكە شارۋا قوجالىقتارىن بىرىكتىرەمىز»، - دەدى «قارىزسىز قوعام» جوباسىنىڭ جەتەكشىسى اقمارال بەكمۇرزايەۆا.
سونىمەن بىرگە، ءىسساپاردا قازاقستاندىق دەلەگاتسيا قىتاي حالىقارالىق كەدەيلىكتى ازايتۋ ورتالىعى ديرەكتورىنىڭ ورىنباسارى لي سين حانىممەن، ق ك پ و ك حالىقارالىق ءبولىمى مەڭگەرۋشىسىنىڭ ورىنباسارى لي مينسيانمەن، سۋن تسينلين اتىنداعى جاستاردىڭ عىلىمي-تەحنيكالىق جانە مادەني الماسۋ ورتالىعىنىڭ باسشىسى گو سينباومەن كەزدەستى.
ودان بولەك، پارتيا وكىلدەرى چيڭداۋ قالاسى لاوشان اۋدانىنداعى جاڭا اۋىلشارۋاشىلىق دەمونستراتسيالىق ايماعىنا باردى جانە جەرگىلىكتى دەڭگەيدە پارتيالىق جۇمىس قۇرۋ تاجىريبەسىن زەردەلەدى.
ەسكە سالا كەتەيىك، «قارىزسىز قوعام» جوباسى بىلتىر 2 -مامىردا باستالعان بولاتىن.
بيىل پرەزيدەنت تاپسىرماسىمەن ەلىمىزدىڭ بارلىق 20 وڭىرىندە، ونىڭ ىشىندە استانا، الماتى، شىمكەنت قالالارىندا حالىقتى قارجىلىق ساۋاتقا جاپپاي وقىتىلدى.
جىل باسىندا ارنايى وقىتىلعان 150 قارجى ساراپشىسى مەن 20 بىلىكتى زاڭگەردىڭ پۋلى قۇرىلدى جانە بۇگىنگى كۇنگە دەيىن 150 مىڭنان استام ادام جاڭا ءبىلىم الدى.
وقۋ كۋرسىنىڭ قاتىسۋشىلارىنا ىڭعايلى بولۋ ءۇشىن qogamfin.kz. ونلاين- پلاتفورماسى ازىرلەندى.
سايت ارقىلى وقۋعا جازىلىپ، پايدالى ماتەريالدار مەن بەينە ساباقتاردى جۇكتەپ الۋعا بولادى.
اۆتور
ايجان سەرىكجان قىزى
