قازاقستاندا جىلقى شارۋاشىلىعى ينستيتۋتى قۇرىلادى

استانا. KAZINFORM - اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم- جومارت توقايەۆ جىلقى شارۋاشىلىعى ينستيتۋتىن قۇرۋدى تاپسىردى.

«قازاقستاندا جىلقىنىڭ بىرنەشە ءتۇرى بار. ونىڭ ىشىندە قازاقپەن بىرگە جاساپ كەلە جاتقان جابىنىڭ ورنى ەرەكشە. كەيىن وعان قوستاناي، كوشىم جانە مۇعالجار تۇقىمدارى قوسىلدى. ءارقايسىسىنىڭ ءوز ەرەكشەلىگى بار. مەن بۇعان دەيىن اداي جىلقىسى ماڭعىستاۋدىڭ باعا جەتپەس قازىناسى ەكەنىن ايتتىم. ونى الەمگە تانىتۋ ءۇشىن ناقتى شارالار قابىلداۋدى تاپسىردىم. قازىر اداي جىلقىسى رەسمي تۇردە بولەك تۇقىم رەتىندە تىركەلدى. بۇل ارعىماقتار ۇلى دالا جورىعىندا، باسقا دا الامان بايگەلەردە توپ جارىپ ءجۇر»، - دەدى پرەزيدەنت.

مەملەكەت باسشىسى قوستاناي جىلقىسى دا مىقتى ەكەنىن، الايدا، جوعالىپ كەتۋدىڭ از-اق الدىندا تۇرعانىن، نەبارى 280 باس قالعانىن ايتتى.

«سوندىقتان جىلقىنىڭ سانىمەن قاتار، ساپاسىن ارتتىرۋ - ماڭىزدى مىندەت. بيىل قازاق جىلقىسىنىڭ تۇقىمىن ساقتاۋ جانە كوبەيتۋ ءۇشىن ارنايى زاڭ قابىلدادىق. ەندى بۇل باعىتتا تاعى ءبىر ماڭىزدى قادام جاسايمىز. مەن ۇكىمەتكە جىلقى شارۋاشىلىعى ينستيتۋتىن قۇرۋدى تاپسىرامىن. بىلىكتى ماماندار مۇنى كوپتەن بەرى ايتىپ ءجۇر. قۇزىرلى ورگاندار قىسقا مەرزىم ىشىندە وسى ماسەلەنى پىسىقتاپ، قارجى كوزدەرىن ناقتىلاۋى كەرەك»، - دەدى قاسىم-جومارت توقايەۆ.

اۆتور

مارلان جيەمباي