قازاقستاندا شەتەل ازاماتتارىن جاساندى ينتەللەكتىنىڭ كومەگىمەن باقىلاماق
استانا. KAZINFORM - ەلىمىزدە سىرتقى كوشى-قون پروتسەسىن باقىلاۋدا سيفرلىق جوبا قولعا الىندى. جاڭا جوبا تۋرالى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ايتىپ بەردى.
- حالىقارالىق اۋەجايلار مەن شەكارا بەكەتتەرىندە تۋريستەرگە QR- كودى بار «ارنايى كارتا» بەرىلەدى. سول ارقىلى شەتەلدىك مەيماندار ەلىمىزدە جايلى جانە قاۋىپسىز ءجۇرۋ ءۇشىن قاجەتتى اقپارات پەن قىزمەت تۋرالى مالىمەت الا الادى. بۇگىندە كوشى-قوندى باقىلاۋدىڭ تيىمدىلىگىن ارتتىرۋ شەڭبەرىندە مينيسترلىك باسىم باعىتتاردى انىقتاپ، ءتيىستى شارالار قابىلداپ جاتىر. كوشى-قون پروتسەسىن باقىلاۋدا سيفرلىق شەشىم قابىلدانىپ، ەنگىزىلەدى. جاساندى ينتەللەكت ارقىلى شەتەلدىكتەردىڭ ەلدە بولۋىن باقىلاۋ جوباسىن باستادىق. جوبانى جىل سوڭىنا دەيىن اياقتايمىز، - دەدى باۋىرجان الەنوۆ ۇكىمەت وتىرىسىندا.
ودان ءارى ءمينيستردىڭ ءبىرىنشى ورىنباسارى كوشى-قون ساياساتى سالاسىندا قۇقىقتىق بازانى جەتىلدىرۋ جۇمىسى تۋرالى ايتتى.
- وتكەن اپتادا كوشى-قون باقىلاۋىن كۇشەيتۋدى كوزدەيتىن زاڭ قابىلداندى. وعان سايكەس، 30 تاۋلىكتەن اسا ەلدە بولۋدى جوسپارلاعان شەتەل ازاماتتارىن تىركەۋ ينستيتۋتى ەنگىزىلدى. ىشكى ىستەر ورگاندارىنا تاۋەكەل ەلدەردىڭ ازاماتتارىنا ەلگە كەلۋدەن، شاقىرتۋدان باس تارتۋ قۇزىرەتى بەرىلدى. سونىمەن قاتار، شەتەل ازاماتىن تىركەۋ ءتارتىبىن بۇزعاندارعا اكىمشىلىك جاۋاپكەرشىلىك ەنگىزۋ ماسەلەسى قارالىپ جاتىر، - دەيدى ول.
ىشكى ىستەر مينيسترلىگىنىڭ مالىمەتىنشە، ەلىمىزدىڭ كوشى-قون رەجيمىن بۇزعان 200 مىڭ شەتەل ازاماتى جاۋاپقا تارتىلدى.
ايتا كەتسەك، پرەمەر-مينيستر كوشى-قون ساياساتىن جەتىلدىرۋگە قاتىستى مينيسترلەرگە بىرنەشە مىندەت جۇكتەدى.
