قازاقستاندا اتوم ەلەكتر ستانسياسىن سالاتىن كومپانيا 1-شىلدەگە دەيىن انىقتالادى

استانا. قازاقپارات - قازاقستاندا ا ە س سالاتىن كونسورسيۋم 1- شىلدەگە دەيىن انىقتالادى. «قازاقستاننىڭ اتوم ەلەكتر ستانسيالارى» ج ش س باس ديرەكتورى ەرنات بەردىعۇلوۆ ۇمىتكەرلەردى ىرىكتەۋ قالاي جۇرگىزىلەتىنىن ايتىپ بەرەدى.

ۆەندوردى تاڭداۋ ءتورت كەزەڭنەن تۇردى. فرانسۋزدىق Assystem كومپانياسى بەكىتكەن تالاپتار بويىنشا شورت- ليستكە 4 مەكەمە ەندى. ولار قىتايدىڭ CNNC؛ رەسەيدىڭ «روس اتوم»، وڭتۇستىك كورەيانىڭ «KHNP» كورپوراتسيالارى جانە فرانسيانىڭ «EDF» كومپانياسى.

ىرىكتەۋگە ساي شورت-ليستكە ەنگەن كومپانيالارمەن كەلىسسوزدەر جۇرگىزىلىپ، قوسىمشا اقپارات الىنادى. كەيىن ولاردىڭ ۇسىنىستارىن باعالاپ، شەشىم قابىلدايدى. باستى تالاپ - قاۋىپسىزدىك. كومپانيالار زاماناۋي III+ بۋىن رەاكتورلارى بار ليتسەنزيالانعان تەحنولوگيالاردى ۇسىنادى.

ەرنات بەردىعۇلوۆتىڭ ايتۋىنشا، ا ە س ءىس جۇزىندە اتموسفەراعا زياندى قالدىقتار شىعارمايدى. ال ونى سالاتىن مەكەمەنىڭ ۇسىناتىن تەحنولوگياسى ۇلتتىق جانە حالىقارالىق ستاندارتتارعا سايكەس بولۋى كەرەك. جوبانىڭ الەۋمەتتىك ماڭىزى دا زور.

ايتا كەتەيىك، تىزىمگە ەنگەن كومپانيالاردىڭ ۇسىنىمدارىن اتوم سالاسىن دامىتۋ جونىندەگى ۆەدومستۆوارالىق كوميسسيا مەن ەنەرگەتيكالىق كەڭەس قاراستىرادى.

24.kz