قازاقستانعا جاپونيادان كەلگەن تۋريستەر قاتارى 9 مىڭنان استى
استانا. KAZINFORM - قازاقستان مەن جاپونيا اراسىنداعى تۋريزم سالاسىنداعى ىنتىماقتاستىق قارقىندى دامىپ كەلەدى.
وتكەن جىلى ەلىمىزگە 9200-دەن استام جاپون تۋريستى كەلىپ، بۇل كورسەتكىش 2023 -جىلمەن سالىستىرعاندا %38- عا ارتتى. كەلۋشىلەر لەگىنىڭ ءوسۋى قازاقستاندىق تۋريزم يندۋسترياسى ءۇشىن جاڭا مۇمكىندىكتەر اشۋدا.
توكيو جانە وساكا قالالارىندا قازاقستاندىق تۋروپەراتورلار جاپونيانىڭ ءىرى تۋريستىك نارىق وكىلدەرىمەن ءبىرقاتار ەكىجاقتى كەزدەسۋ وتكىزدى. Skyway ،Kompass جانە MLtour كومپانيالارى ۇلتتىق اۋە تاسىمالداۋشى Air Astana-مەن بىرلەسىپ، قازاقستاننىڭ تۋريستىك الەۋەتىن HIS ،JATA ،JTB ،Otomo Travel ،Tairiku Travel ،All Seasons Travel سەكىلدى جەتەكشى جاپون كومپانيالارىنا تانىستىردى.
كەلىسسوزدەر بارىسىندا جاپون سەرىكتەستەرىنە جاڭا تۋريستىك ونىمدەر مەن باعىتتار ۇسىنىلدى.
قازاقستاندىق دەلەگاتسيا سونداي-اق وساكا قالاسىندا ەكسپو-2025 اياسىنداعى ىسكەرلىك باعدارلاماعا قاتىستى. «Kazakh Tourism» ۇلتتىق كومپانياسى QazExpoCongress قولداۋىمەن جاپوندىق كومپانيالار مەن قازاقستاندىق تۋروپەراتورلار اراسىندا B2B كەزدەسۋلەر ۇيىمداستىردى. ونىڭ بارىسىندا Air Astana ،«Karavansaray Turkistan» كوپفۋنكسيونالدى تۋريستىك كەشەنى جانە «Open Turkistan» تۋريستىك اقپاراتتىق ورتالىعى ءوز جوبالارىن ۇسىندى.
- جاپون اۋديتورياسى تاراپىنان ەلىمىزگە دەگەن قىزىعۋشىلىقتىڭ ارتقانى بايقالادى جانە بۇل ەلدىڭ كومپانيالارىمەن ىنتىماقتاستىقتى بەلسەندى دامىتۋعا نيەتتىمىز. بۇل - قازاقستاننىڭ تۋريستىك الەۋەتىن پاش ەتۋگە جانە ەكىجاقتى بايلانىستاردى نىعايتۋعا باعىتتالعان ماڭىزدى قادام. Kazakh Tourism ەكى ەلدىڭ تۋريزم بيزنەسى اراسىندا ءتيىمدى ديالوگ ورناتۋعا سەپتىگىن تيگىزەدى، - دەدى «Kazakh Tourism» ۇ ك» ا ق باسقارما ءتوراعاسىنىڭ م. ا. دانيەل سەرجان ۇلى.
وتكىزىلگەن كەزدەسۋلەر جاپونيا تاراپىنان قازاقستانعا قىزىعۋشىلىقتىڭ ارتىپ وتىرعانىن كورسەتتى.
ساراپشىلاردىڭ پىكىرىنشە، بۇل باعىتتا بىرلەسكەن جوبالاردى دامىتۋ ەكى ەل اراسىنداعى تۋريستىك اعىندى ودان ءارى ۇلعايتۋعا مۇمكىندىك بەرەدى.
