قازاقستان يتاليا نارىعىنا بيداي مەن ۇن ەكسپورتىن ارتتىرۋعا دايىن - پرەزيدەنت
استانا. KAZINFORM - قازاقستان يتالياعا 100 دەن استام تاۋار ءتۇرى بويىنشا ەكسپورتتى ۇلعايتۋعا قاۋقارلى. بۇل تۋرالى ەلوردادا «ورتالىق ازيا - يتاليا» سامميتىندە قازاقستان پرەزيدەنتى قاسىم-جومارت توقايەۆ ءمالىم ەتتى.
- ءبىزدىڭ ويىمىزشا، بىرلەسكەن جوبالاردى ىسكە قوسۋعا، وتكىزىلەتىن ءونىم جەلىسىن كەڭەيتۋگە، ەڭ الدىمەن، جوعارى قوسىلعان قۇنى بار شيكىزاتتىق ەمەس ونىمدەرگە ەرەكشە ەكپىن قويۋعا بولادى. قازاقستان يتالياعا قۇنى شامامەن 1 ميلليارد دوللار بولاتىن 100 دەن استام تاۋار پوزيتسياسى بويىنشا ەكسپورتتى ۇلعايتۋعا قاۋقارلى، - دەدى قاسىم-جومارت توقايەۆ.
سونىمەن قاتار پرەزيدەنت ورتالىق ازيا ەلدەرىنىڭ ەۋروپاعا اۋىل شارۋاشىلىعى ونىمدەرىن، ونىڭ ىشىندە ورگانيكالىق ونىمدەردى جەتكىزۋدى ۇلعايتۋدا مۇمكىندىگى زور ەكەنىن ايتتى. وسى ورايدا ەت ونىمدەرىنىڭ، اكۆاشارۋاشىلىق، قۇرعاق ءسۇتتى جانە باسقا دا ازىق-تۇلىك ونىمدەرىنىڭ ەكسپورتىنا ەرەكشە ءمان بەرگەن ءجون.
- قازاقستان يتاليا نارىعىنا بيداي مەن ۇن ەكسپورتىن ارتتىرۋعا دايىن، - دەدى مەملەكەت باسشىسى.
قاسىم-جومارت توقايەۆ اگرارلىق عىلىمي جانە ءبىلىم بەرۋ ورتالىقتارى اراسىنداعى تىعىز ىنتىماقتاستىققا، وزىق تاجىريبەلەر مەن تەحنولوگيالار ترانسفەرتىندە بايلانىستاردى نىعايتۋعا توقتالدى. ەڭ الدىمەن، بيوينجەنەريا، تۇراقتى اۋىل شارۋاشىلىعى جانە مال شارۋاشىلىعى سالالارىن قامتۋ كەرەك.
- بىزدە اۋىل شارۋاشىلىعى ونىمدەرىن قايتا وڭدەۋ سالاسىنداعى تابىستى ىنتىماقتاستىق ءۇشىن ايتارلىقتاي مۇمكىندىكتەر بار، - دەدى پرەزيدەنت.
قازاقستان-يتاليا ستراتەگيالىق سەرىكتەستىگى بارلىق باعىتتا سەرپىندى دامىپ وتىر. 2024- جىلى ەكىجاقتى تاۋار اينالىمىنىڭ كولەمى 24 پايىزعا ءوسىپ، رەكوردتىق 20 ميلليارد دوللارعا جەتتى.
- يتاليا قازاقستاننىڭ ءىرى ساۋدا سەرىكتەستەرىنىڭ ۇشتىگىنە كىرەدى. 2024 -جىلى ەكىجاقتى تاۋار اينالىمىنىڭ كولەمى 24 پايىزعا ءوسىپ، رەكوردتىق 20 ميلليارد دوللارعا جەتتى. يتاليانىڭ سوڭعى جىلدارى ەلىمىزگە قۇيعان ينۆەستيتسياسىنىڭ كولەمى 7,6 ميلليارد دوللاردان استى. بىزدە يتاليالىق كاپيتالدىڭ قاتىسۋىمەن تابىستى جۇمىس ىستەپ جاتقان 270-كە جۋىق كومپانيا بار، ولار قازاقستاننىڭ مۇناي-گاز سالاسىن، بالامالى ەنەرگەتيكانى، ماشينا جاساۋدى، اۋىل شارۋاشىلىعىن دامىتۋعا زور ۇلەس قوسىپ كەلەدى، - دەدى قاسىم-جومارت توقايەۆ.
پرەزيدەنتتىڭ پايىمىنشا، قازاقستان-يتاليا ستراتەگيالىق سەرىكتەستىگى بارلىق نەگىزگى كورسەتكىشتەر بويىنشا تۇراقتى سەرپىندى كورسەتىپ وتىر. سوندىقتان بۇل سەرىكتەستىك اياسىندا ودان دا اۋقىمدى ءوسىم الەۋەتى بار.
- وسى مۇمكىندىكتى پايدالانا وتىرىپ، يتاليا مينيسترلەر كەڭەسىنىڭ ءتوراعاسى دجوردجا مەلوني حانىمعا قازاقستاننىڭ باستامالارىن ۇزدىكسىز قولداعانى جانە ەلدەرىمىز اراسىنداعى قارىم-قاتىناستاردى نىعايتۋعا قوسقان ەلەۋلى ۇلەسى ءۇشىن شىن جۇرەكتەن العىسىمدى بىلدىرگىم كەلەدى. قازاقستان ەكىجاقتى كۇن ءتارتىبى اياسىندا دا، سونداي-اق وڭىرلىك فورماتتا دا ءوزارا مۇددەگە ساي كەلەتىن بارلىق سالادا يتاليامەن جەمىستى ىنتىماقتاستىقتى ودان ءارى جالعاستىرۋدى ماقسات ەتەدى، - دەدى مەملەكەت باسشىسى.
بۇدان بۇرىن حابارلانعانداي، ەلورداداعى تاۋەلسىزدىك سارايىندا مەملەكەت باسشىسى قاسىم-جومارت توقايەۆتىڭ قاتىسۋىمەن «ورتالىق ازيا - يتاليا» العاشقى سامميتى ءوتىپ جاتىر.
ايتۋلى ءىس-شاراعا قۇرمەتتى مەيمانداردان يتاليا مينيسترلەر كەڭەسىنىڭ ءتوراعاسى دجوردجا مەلوني، قىرعىزستان پرەزيدەنتى سادىر جاپاروۆ، وزبەكستان پرەزيدەنتى شاۆكات ميرزيەۆ، تۇرىكمەنستان پرەزيدەنتى سەردار بەردىمۇحامەدوۆ، تاجىكستان پرەزيدەنتى ەمومالي راحمون قاتىسىپ وتىر.
ەسكە سالساق، قازاقستان مەن يتاليا ءبىرقاتار قۇجاتقا قول قويدى.
اۆتور
رۋسلان عابباسوۆ
