قازاقستان گەولوگيا سالاسىندا فينليانديامەن بىرلەسكەن جوبا ازىرلەپ جاتىر

استانا. KAZINFORM - گەولوگيا سالاسىندا تاجىريبە الماسۋ جانە تاۋ-كەن مەتاللۋرگيا كەشەنىن دامىتۋ ماقساتىندا ەلىمىز فينليانديا جانە قىتايدىڭ حالىقارالىق گەولوگيالىق قىزمەتىمەن ىنتىماقتاستىقتى نىعايتىپ جاتىر. تولىعىراق ۇلتتىق گەولوگيالىق قىزمەت ا ق باسقارما ءتوراعاسى ەرلان عاليەۆ ايتىپ بەردى.

- ءبىز فينليانديامەن گەولوگيالىق قىزمەت پەن دەرەكتەر بازاسىن سيفرلاندىرۋ جانە جۇيەلەۋ سالاسىندا بىرلەسكەن جوبانى قولعا الدىق. نەگىزگى سيفرلاندىرۋ جۇمىسىن ءوزىمىز جۇرگىزىپ جاتىرمىز، الايدا دەرەكتەردى ءارى قاراي قۇرىلىمداۋ جانە جۇيەلەۋ ءۇشىن بيىل فينليانديا ماماندارىن تارتۋدى جوسپارلاپ وتىرمىز. ولاردا الەمدەگى جەتەكشى گەولوگيالىق قىزمەتكە يە. فينليانديانىڭ افريكا، ازيا جانە وڭتۇستىك امەريكادا مول حالىقارالىق تاجىريبەسى بار. بۇل جۇمىستى قازاقستان قارجىسى ەسەبىنەن ەمەس، سىرتقى قارجىلاندىرۋ ەسەبىنەن اتقارىپ جاتىرمىز، - دەدى ەرلان عاليەۆ ەلوردادا وتكەن 15- حالىقارالىق تاۋ-كەن مەتاللۋرگيا كونگرەسىندە.

ونىڭ ايتۋىنشا، ەلىمىزدىڭ ءبىرىڭعاي جەر قويناۋىن پايدالانۋ پورتالىن ازىرلەۋدە فينليانديانىڭ تاجىريبەسى ماڭىزدى ءرول اتقارعان. پلاتفورما جاساۋدا فين ينتەرفەيسى مەن بيزنەس-پروتسەستەردى قۇرۋ لوگيكاسىنىڭ ەلەمەنتتەرى قولدانىلعان.

- قىتاي دا قازاقستاننىڭ ماڭىزدى سەرىكتەسى. ەكىجاقتى ىنتىماقتاستىق اياسىندا شەكارا ماڭىنداعى ايماقتا ۇزاق مەرزىمدى جوبا جۇزەگە اسىرىلىپ جاتىر. ەكى ەل شەكاراسىنداعى نىسانداردىڭ گەولوگيالىق الەۋەتىن زەردەلەۋ شەڭبەرىندە ىسكە اسىپ وتىر. جوبانى ونەركاسىپ جانە قۇرىلىس مينيسترلىگىنە قاراستى گەولوگيا كوميتەتى باسقارادى، - دەيدى ول.

بۇعان دەيىن حابارلاعانىمىزداي، قۇيرىقتىكول كەن ورنىندا بارلاۋ جۇمىستارى اياقتالدى.

ايتا كەتەيىك، قازاقستان التىن قورى بويىنشا توپ-20 ەلدىڭ قاتارىنا كىردى.

سونداي-اق جاقىن ارادا تاۋ-كەن كەشەنى سالاسىندا 3,5 تريلليون تەڭگەگە 5 ينۆەستيتسيالىق جوبا ىسكە قوسىلادى دەپ جوسپارلانىپ وتىر.

بۇگىن ەلوردادا حالىقارالىق تاۋ-كەن مەتاللۋرگيا كونگرەسى ءوتتى. وعان الەمنىڭ 20 ەلىنەن 1300 دەلەگات قاتىستى.

اۆتور

داۋلەت ىزتىلەۋ