قازاقستان پرەزيدەنتى رەسمي ساپارمەن يتالياعا باردى
استانا. KAZINFORM - مەملەكەت باسشىسى قاسىم-جومارت توقايەۆ يتالياعا رەسمي ساپارمەن باردى. بۇل تۋرالى اقوردانىڭ باسپا ءسوز قىزمەتىنەن ءمالىم ەتتى.
قازاقستان پرەزيدەنتىن ريم اۋەجايىنان يتاليانىڭ قورعانىس ءمينيسترى گۆيدو كروزەتتو، ريم پاپاسىنىڭ وكىلى فرانچەسكو كاناليني قارسى الدى. مەملەكەت باسشىسىن كۇتىپ الۋ كەزىندە قۇرمەت قاراۋىلى ساپ تۇزەپ تۇردى.
ءمالىم ەتىلگەندەي، قاسىم-جومارت توقايەۆ ەرتەڭ، 18-قاڭتاردا يتاليا پرەزيدەنتى سەردجو ماتتارەللامەن، پرەمەر- مينيستر دجوردجا مەلونيمەن كەلىسسوزدەر جۇرگىزەدى.
سونىمەن قاتار پرەزيدەنت «قازاقستان-يتاليا» ينۆەستيتسيالىق دوڭگەلەك ۇستەلىنە قاتىسىپ، ءبىرقاتار ءىرى كومپانيا باسشىلارىمەن كەزدەسۋلەر وتكىزەدى دەپ جوسپارلانىپ وتىر.
قازاقستان پرەزيدەنتى 19-قاڭتار كۇنى ۆاتيكاندا ريم پاپاسى فرانسيسكپەن كەزدەسپەك.
ايتا كەتەيىك، قاسىم-جومارت توقايەۆ شەت ەلدەرگە بيىلعى العاشقى ساپارىن ەۋروپادان باستاپ وتىر. مەملەكەت باسشىسىنىڭ رەسمي ساپارىنان نە كۇتەمىز جانە بۇعان دەيىن قوس ەل اراسىندا قانداي قارىم-قاتىناس بولدى؟ قازاقپارات ساراپشىسى بۇل جونىندە شولۋ ماتەريال ۇسىنعان ەدى.
اۆتور
گۇلميرا الياكپاروۆا
