قازاقستان رەسەيگە ەلەكتر قۋاتىن نەگە ارزانعا ساتىپ، كەيىن قىمباتقا الادى

استانا. KAZINFORM - قازاقستان رەسەيگە ەلەكتر قۋاتىن نەگە ارزانعا ساتىپ، كەيىن قىمباتقا الادى؟ كومپانيا باسشىلارىنىڭ 2023 -جىلدى قورىتىندىلاعان بريفينگىندە ب ا ق وكىلى وسىنداي سۇراق قويدى.

كومپانيانىڭ باسقارما ءتوراعاسى ءنابي ايتجانوۆ باعا ايىرماشىلىعىنىڭ نەگە 3 ەسەگە جۋىق ەكەنىن ءتۇسىندىردى.

«ءبىز رەسەي فەدەراتسياسىنان ەلەكتر قۋاتىن ەڭ بەلسەندى تۇتىناتىن ساعاتتاردا ساتىپ الامىز. رەسەيدە دە تەڭگەرىم نارىعى بار. ياعني، ەلەكتر قۋاتىنىڭ تاريفى ساعاتتارعا جىكتەلگەن. قاۋىرت ساعات دەپ وتىرعانىمىز - تاڭعى جانە كەشكى ۋاقىت. ياعني، ءبىز قاۋىرت ۋاقىتتاردا العاندىقتان قىمباتقا ساتىپ الامىز. ءيا، بالكىم بۇل قازاقستان ءۇشىن جوعارى تاريف بولىپ كورىنەتىن شىعار. ءبىراق ءبىز ونى ماجبۇرلىكتەن الامىز. ويتكەنى بىزدەگى گەنەراتسيا قاجەتتىلىگىمىزدى تولىق جابا المايدى. ال ءبىز رەسەيگە ساتقان كەزدە وزىمىزدەگى باسى ارتىق قۋاتتى جونەلتەمىز. مۇنداي پروفيتسيت تۇندە پايدا بولادى. رەسەيگە ول قۋاتتىڭ قاجەتى شامالى. ءبىراق ءبىز ونى جۇيەلەردىڭ ءوزارا ىقپالداستىعى اياسىندا جونەلتىپ وتىرامىز. باعا ايىرماشىلىعى ۇلكەن بولىپ كورىنەدى، ءبىراق بۇل ايىرماشىلىق تەڭگەرىم باعاسىنان تۋىنداپ وتىر»، - دەدى كومپانيا باسشىسى.

نۇرجان كەرىمقۇلوۆتىڭ ايتۋىنشا، كەيىنگى ءۇش جىلدا قازاقستانعا رەسەيدەن يمپورتتالاتىن ەلەكتر قۋاتىنىڭ باعاسى بىرتىندەپ ءتۇسىپ كەلەدى.

«2021 -جىلى ءبىز 2023 -جىلعىدان قىمباتقا ساتىپ الاعان ەدىك. 2022 -جىلى 1 كۆ\ساع قۋاتتى 24,88 تەڭگەگە ساتىپ الدىق. 2023 -جىلى 19,37 تەڭگەگە ساتىپ العانبىز»، - دەدى ول.

«KEGOС» ا ق ۇلتتىق ەلەكتر جەلىسى جۇيەلىك قىزمەتتەر جانە دامىتۋ جونىندەگى باسقارۋشى ديرەكتورى نۇرجان كەرىمقۇلوۆتىڭ ايتۋىنشا، رەسەيدەن يمپورتتالاتىن قۋاتتىڭ نەگىزگى بولىگىن ماينەرلەر تۇتىنادى.

«بىزدە ەلەكتر قۋاتى رەسەيدەن ماينەرلەر مەن ءبىرىڭعاي ساتىپ الۋشى قاجەتىلىگىنە قاراي يمپورتتايدى. ماينەرلەر 2023 -جىلى 1 ميلليارد 48 ميلليون كۆت\ساع قۋات ساتىپ الدى. ءبىرىڭعاي ساتىپ الۋشى 1 ميلليارد 778 ميلليون كۆت\ساع قۋات ساتىپ الدى. بۇل كەلىسىمشارتتار كوممەرتسيالىق بولعاندىقتان باعاسىن بىلمەيمىز. بىلتىر رەسەيدەن 1 ميلليارد 588 ميلليون كۆت\ساع قۋات ساتىپ الىنىپ، 1 ميلليارد 329 ميلليون كۆت\ساع قۋاتى ساتىلعان. بۇل حالىقارالىق اعىندار ارقىلى ءجۇردى. ورتاشا باعاسى 1 كۆت\ساع قۋاتقا - 19 تەڭگە. ال ءبىز ساتاتىن باعا 1 كۆت\ساع قۋاتقا - 6,44 تەڭگە. باعادا ايىرماشىلىق بار. ءبىراق ول ۇكىمەتارالىق كەلىسىمدەر ارقىلى رەتتەلەدى»، - دەدى ول.

اۆتور

ەسىمجان ناقتىباي