قازاقستان-قىتاي شەكاراسىنداعى كولىك- لوگيستيكا ماسەلەلەرى قارالدى
استانا. KAZINFORM - ەلوردادا قازاقستان-قىتاي شەكاراسىنداعى كولىك-لوگيستيكا ماسەلەلەرى تالقىلاندى.
بەكەتتەرىندەگى CarGoRuqsat ەلەكتروندى كەزەك جۇيەسىنىڭ جۇمىس ىستەۋى، سونداي-اق ونى جەتىلدىرۋ بويىنشا ۇسىنىستاردى تالقىلاۋ.
سالا وكىلدەرىنىڭ مالىمەتىنشە، اعىمداعى جىلدىڭ باسىنان بەرى پالاتاعا تاسىمالداۋشىلار مەن لوگيستيكالىق كومپانيالاردان مەملەكەتتىك شەكاراداعى قيىندىقتار تۋرالى سۇراقتار كوبەيگەن. ونداعى نەگىزى ماسەلەلەرگە - تومەن وتكىزۋ قابىلەتى، تەحنيكالىق اقاۋلار، جۇيە جۇمىسىنىڭ اشىقتىعى جاتادى. بۇل قيىندىقتار بيزنەس مۇددەلەرىنە عانا ەمەس، سونىمەن قاتار ەكونوميكالىق قاۋىپسىزدىككە، قازاقستاندىق تاسىمالداۋشىلاردىڭ، ەكسپورتتاۋشىلاردىڭ باسەكەگە قابىلەتتىلىگىنە جانە ەلدىڭ ترانزيتتىك الەۋەتىنە تىكەلەي اسەر ەتەدى.
جيىنعا مەملەكەتتىك ورگاندار، وڭىرلىك پالاتالار، سالالىق قاۋىمداستىقتار مەن كولىك كومپانيالارىنىڭ وكىلدەرى قاتىستى.
شاراعا قاتىسۋشىلار «نۇر جولى» جانە «دوستىق» وتكىزۋ بەكەتتەرىندەگى كەزەك ماسەلەسى، وتكىزۋ قابىلەتىنىڭ شەكتەۋلەرى، ەكسپورتتىق جۇكتىڭ باسىمدىقسىز وتكىزىلۋى، پايدالانىلماعان سلوتتاردى قايتا ءبولۋ جانە قىتايلىق تاراپپەن جەدەل ۇيلەستىرۋ قاجەتتىلىگى سياقتى ماسەلەلەردى تالقىلادى.
- قولدانىستاعى جۇيەنىڭ ءبىرقاتار كەمشىلىگى ايقىندالىپ وتىر. ناقتى مىسال، قىتاي شەكاراسىنداعى كەزەكتى برونداعان تاسىمالداۋشى باسقا مەملەكەتتىك شەكارا ارقىلى رەسەي نەمەسە وزبەكستان جاعىنا وتەتىن بولسا، كەزەك الۋ مۇمكىندىگى شەكتەلەدى. سونىمەن بىرگە ءبىرقاتار مەملەكەتتىك شەكاراداعى اۆتوموبيل وتكىزۋ بەكەتتەرىندەگى كولىك قۇرالدارىن وتكىزۋ قابلەتتىلىگى تومەن ەكەندىگى بايقالدى. وسىعان وراي بۇگىن «اتامەكەن» ۇلتتىق كاسىپكەرلەر پالاتاسىندا مۇددەلى مەملەكەتتىك ورگانداردىڭ قاتىسۋىمەن، بيزنەس وكىلدەرىنىڭ قاتىسۋىمەن ورتاق مامىلەگە كەلۋ ماقساتىندا جيىن ۇيىمداستىرىپ وتىرمىز، - دەيدى «اتامەكەن» ۇلتتىق كاسىپكەرلەر پالاتاسى لوگيستيكا جانە تاسىمالداۋ دەپارتامەنتى ديرەكتورىنىڭ ورىنباسارى قۋانىش ەرمۇحانوۆ.
ول سونىمەن بىرگە بۇل ماسەلەلەردى شەشۋدەگى ءوز ۇسىنىستارىن ورتاعا سالدى.
- پاراللەلدى برونداۋ مەحانيزمىن قاراستىرۋ نەمەسە بۇرىن بەرىلگەن بروندى توقتاتا تۇرۋ، جالپى برونداۋ سلوتتار سانىن كوبەيتۋ، بۇل وتكىزۋ بەكەتتەرىنىڭ قابىلەتتىلىگىنە قاراي بولىنەدى. مىسالى، بۇگىنگى تاڭدا «نۇر جولى» بەكەتىندە تاۋلىگىنە 550 اۆتوكولىك قۇرالى وتەتىن بولسا، بۇل ساندى 1000 نان اسىرۋعا ۇسىنىس بەرەمىز - دەيدى ول.
ەسكە سالايىق، بۇگىن پرەزيدەنت قاۋىپسىزدىك كەڭەسىنىڭ وتىرىسىندا كولىك سالاسىنداعى كەمشىلىكتەر ءۇشىن مارات قارابايەۆقا سوگىس جاريالادى.
اۆتور
ريزابەك نۇسىپبەك ۇلى
