قازاقستان قاشاعان وپەراتورىنان تالاپ ەتىپ وتىرعان سومانى 160 ميلليارد دوللارعا ۇلعايتتى

استانا. KAZINFORM - قازاقستان تاراپى قاشاعان كەن ورنىن يگەرۋشى الپاۋىت كومپانيالارعا قويعان تالاپ سوماسىن 150 ميلليارد دوللاردان 160 ميلليارد دوللارعا دەيىن ۇلعايتقان.

 Bloomberg- ءتىڭ مالىمەتىنشە، قازاقستان وپەراتورلاردان سىبايلاس جەمقورلىق مامىلەلەر بويىنشا قوسىمشا 10 ميلليارد دوللار تالاپ ەتكەن.

ەسكە سالساق، قازاقستاننىڭ قاشاعان كەن ورنىن يگەرۋشى كومپانيالاردان 150 ميلليارد دوللار تالاپ ەتكەنى تۋرالى مالىمەتتەر بيىلعى كوكتەمدە شىعا باستاعان. وعان دەيىن ەل ۇكىمەتى وپەراتورلاردان 16,5 ميلليارد دوللار ءوندىرۋ جولىندا ارەكەت ەتىپ كەلگەن. كەيىن سوما كۇرت ءوسىپ، ۇستىنە 138 ميلليارد دوللار قوسىلعان.

مۇناي- گاز سالاسىنىڭ ساراپشىسى اسقار سمايىلوۆ Kazinform تىلشىسىنە بەرگەن سۇحباتىندا تالاپ سوماسىن 150 ميلليارد دوللارعا دەيىن كوتەرۋدىڭ استارىندا نە جاتقانى تۋرالى پايىمىن ايتقان ەدى. ونىڭ ايتۋىنشا، باستاپقى 15 ميلليارد دوللاردى بىرنەشە تالاپپەن تۇسىندىرۋگە بولادى. ءبىرىنشىسى - قورشاعان ورتا، ەكىنشىسى - ءونىمدى ءبولۋ تۋرالى كەلىسىم (ءو ب ك) بويىنشا قازاقستان وتەگىسى كەلمەيتىن شىعىندار.

«نەگە تالاپ- ارىز سوماسى $138 ميللياردقا ءوستى؟ مەنىڭ ويىمشا، بۇعان بىرنەشە فاكتوردى اتاۋعا بولادى. بىرىنشىدەن، پرەزيدەنتتىڭ 2029 -جىلعا قاراي ىشكى جالپى ءونىمدى ەكى ەسە ارتتىرۋ كەرەك دەگەن تاپسىرماسى بار. …سوندىقتان 138 ميلليارد دوللاردى تالاپ ەتۋ پرەزيدەنتتىڭ ج ءى ءو- ءنى ۇلعايتۋ جونىندەگى تاپسىرماسىنا سايكەس كەلەدى» ، — دەيدى ساراپشى.

قازاقستان تاراپى «قاشاعان جوباسى وپەراتورلار ۋادە ەتكەندەي ىركىلىسسىز جۇمىس ىستەگەن بولسا، كەيىنگى 20 جىلدا ەل قازىناسىنا 138 ميلليارد دوللار كىرىس تۇسكەن بولار ەدى» دەيتىن ءۋاجدى العا تارتىپ وتىر.

«مۇنايدىڭ قازىرگى باعاسى مەن تالاپ-ارىزدىڭ كولەمىنە قارايتىن بولساق، بۇل شامامەن 250 ميلليون توننا مۇناي دەگەندى بىلدىرەدى. ال كەن ورنىنداعى قازىرگى ءوندىرىستى ەسكەرە وتىرىپ، بۇل قاشاعانداعى شامامەن 15-20 جىلدىق ءوندىرىس كولەمى دەپ بولجاۋعا بولادى. مەردىگەر كومپانيالار 2005-جىلى كوممەرتسيالىق ءوندىرىس بولادى دەپ ۋادە ەتكەن، سودان كەيىن 2008-جىلعا شەگەردى، ودان سوڭ 2013، سوسىن 2016 -جىلعا اۋىستىردى. بۇل تۇرعىدا اتالعان سوما سونىڭ وتەمىنە سايكەس كەلەدى. ياعني، 20 جىل ءوندىرۋ دەگەنىمىز 250 ميلليون توننا جانە بۇل شامامەن 138 ميلليارد دوللار بولادى»، - دەپ توپشىلايدى اسقار سمايىلوۆ.

ەسكە سالا كەتەيىك، بۇعان دەيىن ەنەرگەتيكا ءمينيسترى الماسادام ساتقاليەۆ قازاقستاننىڭ قاشاعان مۇناي كەن ورنىن يگەرۋشى حالىقارالىق مۇناي كومپانيالارىنان 150 ميلليارد دوللار تالاپ ەتۋىنە قاتىستى پىكىر ءبىلدىرىپ، بۇل - تازا كوممەرتسيالىق داۋ ەكەنىن ايتقان بولاتىن. ونىڭ پايىمىنشا، ماسەلە ءونىمدى ءبولۋ تۋرالى كەلىسىمدى جۇزەگە اسىرۋ اياسىنداعى رەسپۋبليكانىڭ قۇقىقتارى جايىندا بولىپ وتىر. بارلىق اقپارات قۇپيا، كەلىسۋ، بەكىتۋ، سوت شەشىمى بويىنشا رەسمي پروتسەدۋرالار جۇرگىزىلىپ جاتىر.

اۆتور

ەسىمجان ناقتىباي