قازاقستان مۇنايعا تاۋەلدىلىكتى ازايتىپ، وڭدەۋ ونەركاسىبىنىڭ وسۋىنە ەكپىن قويادى - فورۋم

استانا. KAZINFORM - بۇگىن استانا حالىقارالىق فورۋمىندا ق ر ۇلتتىق ەكونوميكا ۆيتسە- ءمينيسترى ارمان قاسەنوۆ شيكىزاتتىق ەمەس سەكتوردا باسىمدىق بەرىلەتىن باعىتتاردى اتادى.

- جالپى ىشكى ونىمدەگى مۇناي سالاسىنىڭ ۇلەسى ازايىپ كەلەدى. بۇل جاعداي باسقا سالالاردىڭ، ەڭ الدىمەن وڭدەۋ ونەركاسىبىنىڭ جىلدام قارقىنمەن وسۋىنە بايلانىستى بايقالىپ وتىر. بىلتىر ءبىز مۇنى تاعى دا ءىس جۇزىندە كوردىك. وزدەرىڭىز بىلەسىزدەر، 2024 -جىلى قازاقستاندا مۇناي ءوندىرۋ ءتىپتى تومەندەدى. وسىعان قاراماستان، ەكونوميكانىڭ قالعان بولىگى جوعارى قارقىنمەن ءوستى. ال ەكونوميكانىڭ جالپى ءوسىمى 4,8 پايىزدى قۇرادى، - دەدى ا. قاسەنوۆ.

ۆيتسە-مينيستر وڭدەلگەن ءونىمنىڭ ەكسپورتى ءوسىپ كەلە جاتقانىن ايتا كەلە، بىلتىرعى بۇل كورسەتكىش دوللار ەكۆيۆالەنتىندە 12 پايىزعا ارتقانىن جەتكىزدى.

- ءوندىرۋ دەڭگەيى (مۇنايدىڭ) تابيعي فاكتورلارمەن وبەكتيۆتى تۇردە شەكتەلگەندىكتەن، ول 5 جىلدىڭ ىشىندە 105 ميلليون توننا مۇناي دەڭگەيىندە شارىقتاۋ شەگىنە جەتەدى دەگەن پىكىر بار. بىلتىر ءبىز شامامەن 88 ميلليون توننا مۇناي وندىردىك، ياعني ءوسىم 17 پايىزبەن شەكتەلدى. وبەكتيۆتى تۇردە مۇناي سەكتورىنىڭ ءرولى مەن ۇلەسى تومەندەي بەرەدى. بۇل رەتتە قاي باعىتقا كوڭىل ءبولۋىمىز كەرەك؟ بىرىنشىدەن، ج ءى ءو قۇرىلىمىندا ەڭبەك ونىمدىلىگى جوعارى بولۋى ءتيىس. ەكىنشىدەن، ەكسپورتقا قابىلەتتىلىگى جوعارى سالالار بولعانىن قالايمىز. وزدەرىڭىز بىلەتىندەي، قازاقستاندا شيكىزاتتى وڭدەيتىن سالالاردىڭ ۇلەسىن ايتارلىقتاي ارتتىرۋدا الەۋەتى وتە جوعارى، - دەدى ول.

ەسكە سالساق، بىلتىر ەلىمىز 87,7 ميلليون توننا مۇناي ءوندىردى.

2025 -جىلعا ارنالعان مۇناي ءوندىرۋ كولەمى جوبالىق قۇجاتتارعا سايكەس 96,2 ميلليون توننانى قۇرايدى.

ال 2026 -جىلدان باستاپ ءىرى جوبالاردى جۇزەگە اسىرۋ ەسەبىنەن جىلدىق مۇناي ءوندىرۋ كولەمى 100 ميلليون توننادان اسادى.

اۆتور

رۋسلان عابباسوۆ