قازاقستان مەن رەسەي اراسىندا 20 قۇجاتقا قول قويىلادى
استانا. KAZINFORM - قازاقستان مەن رەسەي اراسىندا 20 قۇجاتقا قول قويىلادى. بۇل تۋرالى اقوردادا ەلىمىزگە مەملەكەتتىك ساپارمەن كەلگەن رەسەي پرەزيدەنتى ۆلاديمير پۋتينمەن شاعىم قۇرامداعى كەزدەسۋ بارىسىندا مەملەكەت باسشىسى قاسىم-جومارت توقايەۆ ايتتى.
«ءسىزدىڭ بۇگىنگى ساپارىڭىزدىڭ كۇن ءتارتىبى وتە اۋقىمدى. ساپار قارساڭىندا ۇكىمەت مۇشەلەرى كەزدەسىپ، ءبىز تالقىلايتىن بارلىق ماسەلەنى پىسىقتادى. بۇگىن وتە ماڭىزدى قۇجاتتاردى قابىلدايمىز. بۇل 20 كەلىسىمنەن تۇراتىن قۇجاتتار ءبىزدىڭ تاتۋ كورشىلىك جانە سەرىكتەستىك رۋحىنداعى ىنتىماقتاستىعىمىزدى ودان ءارى دامىتۋعا تىڭ سەرپىن بەرەدى، - دەدى مەملەكەت باسشىسى.
رەسەي فەدەراتسياسىنىڭ پرەزيدەنتى ۆلاديمير پۋتين قازاقستانداعى كەزەكتى مەملەكەتتىك ساپارى اياسىنداعى شاعىن قۇرامداعى كەلىسسوزدە ەكى ەلدىڭ الىس-بەرىسىنە توقتالدى.
«بۇگىنگى كەلىسسوزدەردىڭ قورىتىندىسى بويىنشا ءبىرقاتار قۇجات قابىلدانادى. ولاردىڭ قاتارىندا بىرلەسكەن مالىمدەمە جانە ءتۇرلى سالاداعى ىقپالداستىعىمىزعا قاتىستى قۇجاتتار بار. رەسەي قازاقستاننىڭ ەڭ ءىرى ساۋدا- ەكونوميكالىق سەرىكتەسىنىڭ ءبىرى بولىپ قالا بەرەدى. ساۋدا اينالىمى ءوستى، بىلتىر ونىڭ كولەمى 28,5 ميلليارد دوللاردى قۇرادى. قازاقستان ەكونوميكاسىنا قۇيىلعان ينۆەستيتسيا 13 ميلليارد دوللارعا جەتتى. ارينە، ءبىز ازاماتتىق قوعام، ءبىلىم، عىلىم جانە مادەنيەت باعىتىندا دامىپ كەلە جاتقان گۋمانيتارلىق بايلانىستارىمىزدى باعالايمىز. بۇل تۇرعىدا رەسەيدە ءبىلىم الاتىن شەتەلدىك ستۋدەنتتەردىڭ باسىم بولىگىن قازاقستاندىق جاستار قۇرايتىنىن ايتساق جەتكىلىكتى»، - دەدى رەسەي پرەزيدەنتى.
ونىڭ سوزىنشە، ەكى ەلدىڭ اراسىنداعى ايماقارالىق ىنتىماقتاستىق تا تابىستى ءوربىپ كەلەدى.
«بۇگىن ۋفادا كەزەكتى ءىس- شارا ءوتىپ جاتىر. سىزگە رەسەي- قازاقستان ىنتىماقتاستىعىن دامىتۋعا ەرەكشە نازار اۋدارعانىڭىز ءۇشىن العىس ايتامىن. ءبىز قازاقستان پرەزيدەنتىنىڭ وسىناۋ ماڭىزدى جۇمىستارعا ءاردايىم ىقىلاس قويىپ وتىراتىنىن جاقسى سەزىنەمىز. قازاقستاندى ادال دوسىمىز جانە جاقىن وداقتاسىمىز دەپ تانيمىز، - دەدى ۆلاديمير پۋتين.
