قازاقستان مەن قىتاي ستراتەگيالىق سەرىكتەستىكتى تەرەڭدەتۋ تۋرالى 24 كەلىسىم جاساستى
استانا. KAZINFORM - پرەزيدەنت قاسىم-جومارت توقايەۆ پەن ق ح ر ءتوراعاسى شي جينپيىڭ جۇرگىزگەن كەلىسسوز ناتيجەسىندە 24 ۇكىمەتارالىق جانە ۆەدومستۆوارالىق قۇجاتقا قول قويىلدى.
ەكى ەل دەلەگاتسياسىنىڭ مۇشەلەرى ەنەرگەتيكا، ايەروعارىش، سيفرلاندىرۋ، كەدەن، اۋىل شارۋاشىلىعى، ەلەكتروندى ساۋدا، تۋريزم، زياتكەرلىك مەنشىك، مەديتسينا، مەديا، عىلىم، ءوڭىرارالىق بايلانىس سالالارىنداعى ىنتىماقتاستىقتى قامتيتىن قۇجاتتارمەن الماستى.
ولاردىڭ ىشىندە ينۆەستيتسيالاردى كوتەرمەلەۋ جانە ءوزارا قورعاۋ، تەحنيكالىق-ەكونوميكالىق ىنتىماقتاستىق تۋرالى ۇكىمەتارالىق كەلىسىمدەر بار.
بۇدان بۇرىن پرەزيدەنت قاسىم-جومارت توقايەۆ اقوردا رەزيدەنسياسىندا قىتاي حالىق رەسپۋبليكاسىنىڭ ءتوراعاسى شي جينپيىڭدى قارسى العانىن جازعان ەدىك.
كەيىننەن مەملەكەت باسشىسى ق ح ر توراعاسىمەن كەلىسسوز جۇرگىزدى. توقايەۆ ەكىجاقتى قارىم-قاتىناس جىلدان جىلعا نىعايىپ، جاڭا «التىن كەزەڭگە» قادام باسقانىن مالىمدەدى.
پرەزيدەنت ق ح ر توراعاسىمەن جۇرگىزگەن كەلىسسوز بارىسىندا قىتايدى قازاقستاننىڭ تاتۋ كورشىسى جانە ۋاقىت تەزىنەن وتكەن سەنىمدى ستراتەگيالىق سەرىكتەسى دەپ اتادى.
