قازاقستان مەن قىتاي اراسىندا تەمىرجول ارقىلى جۇك تاسىمالى 100 ميلليون تونناعا جەتەدى
استانا. KAZINFORM - بۇگىن ەلوردادا العاش «قازاقستان- قىتاي» كولىك فورۋمى ءوتتى.
- بىلتىر ەكى ەل اراسىندا تەمىرجول ارقىلى جۇك تاسىمالداۋ %13- عا ءوسىپ، 32 ميلليون توننا بولدى، بۇل قازىر رەكورد بولىپ تۇر. بيىل «دوستىق-مويىنتى» تەمىرجولىنىڭ ەكىنشى ءدالىزى ىسكە قوسىلعان سوڭ ەكى ەل اراسىنداعى تەمىرجول قاتىناسىنىڭ قۋاتتىلىعى قازىرگىدەن 62 ميلليون تونناعا جەتەدى. ال 2027 -جىلدىڭ سوڭىنا قاراي بۇكىل جۇمىستى اياقتاعان سوڭ 100 ميلليون تونناعا جەتەدى، - دەدى كولىك ءمينيسترى مارات قارابايەۆ ەلوردادا وتكەن «قازاقستان - قىتاي» كولىك فورۋمىنان كەيىن ب ا ق وكىلدەرىنىڭ ساۋالىنا جاۋاپ بەرە وتىرىپ.
ودان ءارى مينيستر ەكى ەل اراسىنداعى كولىك قاتىناسى جاعدايىنا توقتالدى.
- بۇرىن قىتاي كولىكتەرى قازاقستاننىڭ ىشىنە كىرە المايتىن، كەرىسىنشە ءبىزدىڭ كولىكتەردە كىرە المادى. 2023 -جىلى مەملەكەت باسشىسى قاسىم-جومارت توقايەۆتىڭ قىتايعا مەملەكەتتىك ساپار بارىسىندا ۇكىمەتارالىق كەلىسىمشارتقا قول قويىلدى، سونىڭ ارقاسىندا بۇگىندە ەكى ەل كولىكتەرى ەمىن-ەركىن قاتىناپ جاتىر جانە باسقا ەلگە وتە الادى. سوڭعى ەكى جىلدىڭ ىشىندە قىتايدان قازاقستان ارقىلى كولىك قاتىناسى ترانزيتى ەكى ەسە ۇلعايدى، - دەيدى ۆەدومستۆو باسشىسى.
ايتا كەتەيىك، العاشقى كولىك فورۋمىنا قازاقستان مەن قىتايدىڭ كولىك مينيسترلەرى مارات قارابايەۆ پەن ليۋ ۆەي قاتىستى.
سونداي-اق اتالعان شاراعا ەكى ەلدىڭ بيزنەس-قاۋىمداستىعى مەن كولىك-لوگيستيكالىق كومپانيالارىنىڭ 300-دەن استام وكىلى كەلگەن. فورۋم اياسىندا B2B جانە G2B كەزدەسۋلەر ۇيىمداستىرىلدى. فورۋم اياسىندا SPG تسينداو پورتتار توبى مەن قازاقستاننىڭ قۇرىق پورتى اراسىندا مەموراندۋمعا قول قويىلدى.
مامىردىڭ باسىندا قىتاي- قىرعىزستان- وزبەكستان تەمىرجولىنىڭ قۇرىلىسى باستالدى.
اۆتور
داۋلەت ىزتىلەۋ
