قازاقستان شەتەلدەگى مىڭنان استام جىلجيتىن جانە جىلجىمايتىن مۇلىك دەرەكتەرىن تەكسەرىپ جاتىر

استانا. KAZINFORM - قازاقستان شەتەلدەگى مىڭنان استام جىلجيتىن جانە جىلجىمايتىن مۇلىك دەرەكتەرىن تەكسەرىپ جاتىر. بۇل تۋرالى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتوراعاسى نۇرداۋلەت سۇيىندىكوۆ ايتتى.

«اكتيۆتەردى قايتارۋ جونىندەگى كوميتەت دەرەكتەردىڭ كەڭ اۋقىمىمەن جۇمىس جاساپ جاتىر. ەلىمىزدەگى جانە شەتەلدەگى مىڭنان استام جىلجىمالى جانە جىلجىمايتىن مۇلىك وبەكتىلەرىنىڭ دەرەكتەرى زەردەلەنىپ وتىر. بانك شوتتارى مەن ترانزاكسيالار بويىنشا مالىمەتتەر تالدانۋدا. ونىڭ ىشىندە 1,5 تريلليون تەڭگەگە شەكتى جانە كۇدىكتى وپەراتسيالار بار. ءبىرقاتار كاسىپورىندى ساتۋ تۋرالى، جەر قويناۋىن پايدالانۋعا جاسالعان كەلىسىمشارتتاردىڭ، باعالى قاعازدار جانە ءىرى كومپانيالارداعى ۇلەستەرگە قاتىستى مامىلەلەردىڭ زاڭدىلىعى تەكسەرىلىپ وتىر. ناتيجەلەرى بويىنشا جەتكىلىكتى نەگىزدەر بولىپ جاتقان جاعدايدا كوميسسيانىڭ ماقۇلداۋىمەن اكتيۆتەردى قايتارۋ جونىندەگى شارالار قولدانىلاتىن بولادى»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، كوميتەت ۇرلانعان اكتيۆتەردى قايتارۋ جونىندە بىرىككەن ۇلتتار ۇيىمى مەن دۇنيەجۇزىلىك بانكتىڭ ستار باستاماسىمەن ءوزارا ءىس-قيمىل جاسالعان. ينتەرپولدىڭ «كۇمىس بيۋللەتەن» جانە «كۇمىس حابارلاما» اتتى اكتيۆتەردى قايتارۋدىڭ جاڭا قۇرالىن ازىرلەۋ جونىندەگى جۇمىس توبىنا بەلسەندى قاتىسقان.

«ەۋروپا كەڭەسى كوميتەت ءۇشىن ۇلكەن دەرەكتەردى تالداۋ جانە ۆيزۋاليزاتسيالاۋ باعدارلاماسىن ساتىپ اپەردى. گلوبي جاھاندىق سىبايلاس جەمقورلىققا قارسى جەدەل جەلىسىنە مۇشەلىككە كىردىك. اقپاراتپەن الماسۋ ارناسىن ورناتتىق. بىرىككەن ۇلتتار ۇيىمى ەسىرتكىگە جانە قىلمىستىلىققا قارسى باسقارماسىنىڭ قولداۋىمەن اكتيۆتەردى قايتارۋ تەتىكتەرىن جەتىلدىرۋ، كوميتەت قىزمەتكەرلەرى ءۇشىن وقىتۋ ترەنينگتەرىن ۇيىمداستىرۋ بويىنشا ءبىرقاتار شارالار ىسكە اسىرىلىپ وتىر. ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمىمەن بىرلەسىپ، اكتيۆتەردى قايتارۋ بويىنشا كەشەندى جوبا ازىرلەۋ پىسىقتالىپ جاتىر»، - دەدى نۇرداۋلەت سۇيىندىكوۆ.

اۆتور

مارلان جيەمباي