قازاقستان-بريتان تەحنيكالىق ۋنيۆەرسيتەتىنىڭ مەنشىك يەسى تۋرالى ماسەلە جوعارعى سوتتا قارالىپ جاتىر
الماتى. KAZINFORM - قازاقپارات اگەنتتىگى عىلىم جانە جوعارى ءبىلىم مينيسترلىگى مەن قايتارىلعان اكتيۆتەردى باسقارۋ كومپانياسىنا ق ب ت ۋ- دىڭ قازىرگى مەنشىك يەسى تۋرالى ساۋال جولدادى.
بيىل ناۋرىز ايىندا قبتۋ مەملەكەتكە قالاي قايتارىلعانى بەلگىلى بولدى.
الايدا كەيىنىرەك اگەنتتىك ساۋالىنا جاۋاپ بەرگەن قايتارىلعان اكتيۆتەردى باسقارۋ كومپانياسى بۇل ماسەلە ءالى تولىق شەشىلمەگەنىن حابارلادى.
ماسەلەنى ناقتىلاۋ ءۇشىن قايتا جولدانعان ساۋالعا عىلىم جانە جوعارى ءبىلىم مينيسترلىگى قازاقستان-بريتان تەحنيكالىق ۋنيۆەرسيتەتى ۆەدومستۆولىق باعىنىستى ۇيىمدار تىزبەسىنە كىرمەيتىنىن جانە ونىڭ قۇقىقتىق ماربەسىنە قاتىستى سۇراققا جاۋاپ بەرە المايتىنىن مالىمدەدى.
جالپى ۆەدومستۆو مالىمەتىنشە، قازىرگى ۋاقىتتا قبتۋ- دا باكالاۆرياتتا - 7956 ستۋدەنت، ماگيستارتۋرادا — 887 ستۋدەنت، دوكتورانتۋرادا — 120 ستۋدەنت ءبىلىم الىپ جاتىر. 2024-2025 وقۋ جىلىندا بىتىرۋشىلەر سانى: باكالاۆرياتتا — 975 ادام، ماگيستراتۋرادا — 432 ادام، دوكتورانتۋرا — 32 ادام.
ال «قايتارىلعان اكتيۆتەردى باسقارۋ كومپانياسى» ج ش س- نىڭ جاۋابىنا سايكەس، ۋنيۆەرسيتەتتىڭ مەنشىك يەسى تۋرالى ماسەلە جوعارعى سوتتا قارالىپ جاتىر.
- قازاقستان-بريتان تەحنيكالىق ۋنيۆەرسيتەتىنىڭ بولاشاق تاعدىرىنا قاتىستى ماسەلە ءالى دە اشىق كۇيىندە قالىپ وتىر. بۇرىنعى اكسيونەرلەر باستاماشى بولعان ازاماتتىق ءىس قازىرگى ۋاقىتتا جوعارعى سوتتا قارالىپ جاتىر. داۋعا قاتىستى تۇپكىلىكتى شەشىم ەلىمىزدىڭ جوعارعى سوت ورگانى قاۋلى شىعارعاننان كەيىن قابىلدانادى، - دەلىنگەن جاۋاپتا.
ەسكە سالايىق، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك مەملەكەتكە قايتارىلىپ جاتقان قازاقستان-بريتان تەحنيكالىق ۋنيۆەرسيتەتىنىڭ كەلەشەگى تۋرالى پىكىر ءبىلدىردى.
اۆتور
دوسبول اتاجان
