قازاقستان بەنزينمەن تولىق قامتاماسىز ەتىلگەن - ەرلان اقكەنجەنوۆ
استانا. KAZINFORM - ۇكىمەتتەگى باسپا ءسوز ءماسليحاتى بارىسىندا ق ر ەنەرگەتيكا ءمينيسترى ەرلان اقكەنجەنوۆ رەسەي فەدەراتسياسىنىڭ اي-92 جانە اي-95 ماركالى بەنزيننىڭ ەكسپورتىنا كەزەكتى شەكتەۋ ەنگىزۋى تۋرالى پىكىر ءبىلدىردى. بۇل تۋرالى ەنەرگەتيكا مينيسترلىگى ءمالىم ەتتى.
ءمينيستردىڭ ايتۋىنشا، رەسەي وسىنداي شارالاردى قاتارىنان ءۇشىنشى جىل قابىلداپ وتىر. الايدا بۇل شەكتەۋلەر ينديكاتيۆتىك تەڭگەرىمدەر شەڭبەرىندە ۇكىمەتارالىق كەلىسىمدەرگە قول قويعان ەلدەرگە قاتىستى ەمەس. قازاقستان - سول ەلدەردىڭ ءبىرى. قۇجاتقا سايكەس، ەلىمىزگە 285 مىڭ توننا بەنزين ەكسپورتتاۋعا كۆوتا بەرىلگەن.
- ىشكى نارىقتاعى جاعداي تۇراقتى. قازاقستان ءوزىن بەنزينمەن تولىق قامتاماسىز ەتىپ وتىر. ءتىپتى، تاريحتا العاش رەت 70 مىڭ توننادان استام بەنزين ەكسپورتتادىق - بۇل جەتكىزۋ مەن وندىرۋدە ەشقانداي ىركىلىستىڭ جوق ەكەنىن دالەلدەيدى، - دەدى ەرلان اقكەنجەنوۆ.
مينيستر ەلىمىزدە جانارماي تاپشىلىعى جوق ەكەنىن اتاپ ءوتتى، دەگەنمەن مۇناي ونىمدەرىنىڭ زاڭسىز شىعارىلۋىنا جول بەرمەۋ ءۇشىن باقىلاۋدى كۇشەيتۋ قاجەت.
