قاڭتاردا مەملەكەتتىك بيۋدجەتكە 1 تريلليون تەڭگە ءتۇستى - قارجى ءمينيسترى

استانا. KAZINFORM - بيىل قاڭتار ايىنىڭ قورىتىندىسى بويىنشا مەملەكەتتىك بيۋدجەتكە شامامەن 1 تريلليون تەڭگە ءتۇستى. بۇل تۋرالى قارجى ءمينيسترى ءمادي تاكيەۆ ءمالىم ەتتى.

«مەملەكەتتىك بيۋدجەتكە شامامەن 1 تريلليون تەڭگە ءتۇستى، جوسپار %111,5 ورىندالدى. رەسپۋبليكالىق بيۋدجەتكە كىرىستەر 521 ميلليارد تەڭگەنى قۇرايدى (جوسپار %78,4). جوسپار بويىنشا كىرىستەر 143 ميلليارد تەڭگەگە ورىندالمادى، ونىڭ ىشىندە سالىقتار بويىنشا 151 ميلليارد تەڭگە. بيىل ەكونوميكانىڭ ۇزدىكسىز وسۋىنە قاراماستان، نەگىزگى ەكسپورتتىق تاۋارلارعا باعانىڭ تومەندەۋ ءۇردىسى ساقتالىپ وتىر. ماسەلەن، وسى جىلى قاڭتاردا مەتالدىڭ باعاسى ورتا ەسەپپەن %10,3- عا تومەندەدى»، - دەدى ءمادي تاكيەۆ ۇكىمەت وتىرىسىندا.

ءمينيستردىڭ ايتۋىنشا، باعانىڭ تومەندەۋىنە ءىرى كومپانيالاردا تۋىنداعان لوگيستيكا مەن رەسپۋبليكالىق بيۋدجەتتىڭ نەگىزگى سالىقتارى بويىنشا بولجامدى كورسەتكىشتەردىڭ ورىندالماۋ فاكتورى اسەر ەتتى.

«بۇل دەگەنىمىز كورپوراتيۆتىك تابىس سالىعى، يمپورتقا سالىناتىن قوسىلعان قۇن سالىعى، شيكى مۇنايعا سالىناتىن ەكسپورتتىق كەدەن باجى. بۇل رەتتە قاڭتار ايىنان باستاپ ءبىز قوسىلعان قۇن سالىعى بويىنشا وتكەن كەزەڭنىڭ بورىشتارىن قايتارىپ جاتىرمىز. قوسىلعان قۇن سالىعىن قايتارۋدى جەڭىلدەتۋ ءۇشىن ءبىرىنشى توقساننىڭ سوڭىنا دەيىن ونى قايتارۋ قاعيدالارىنا ءتيىستى وزگەرىستەر ەنگىزەمىز»، - دەيدى ول.

اۆتور

داۋلەت ىزتىلەۋ