قاسىم-جومارت توقايەۆ نۇرسۇلتان نازاربايەۆتىڭ مەمۋارى تۋرالى پىكىر ءبىلدىردى
مەملەكەت باسشىسى قاسىم-جومارت توقايەۆ سۇحباتىندا تۇڭعىش پرەزيدەنت نۇرسۇلتان نازاربايەۆتىڭ مەمۋارى تۋرالى سۇراقتارعا جاۋاپ بەردى، دەپ حابارلايدى Kazinform.
«تۇڭعىش پرەزيدەنتتىڭ مەمۋارى قوعامدا قىزۋ تالقىلاندى. ءسىز دە ول كىتاپتى وقىعان شىعارسىز. كوپتەگەن شەشىم مەن وقيعاعا تىكەلەي كۋا بولعان ادام رەتىندە قانداي اسەر الدىڭىز؟ ءوزىڭىزدىڭ مەمۋار جازاتىن ويىڭىز بار ما؟»، - دەپ سۇراق قويدى «قازاق گازەتتەرى» ج ش س باس ديرەكتورى ديحان قامزابەك ۇلى.
ءوز جاۋابىندا پرەزيدەنت بۇل كىتاپتىڭ تاۋەلسىز مەملەكەت قۇرۋ ءىسىنىڭ جىلناماسى رەتىندە وقىرمان قىزىعۋشىلىعىن تۋعىزاتىنىن جەتكىزدى.
«كەزىندە ءبىر ايتقىش «مەمۋاردا شىندىقتىڭ جارتىسى ايتىلسا دا، ول تاريحي وقيعالاردىڭ اۋقىمىن باعامداۋعا جەتكىلىكتى» دەگەن ەكەن. نۇرسۇلتان نازاربايەۆ - بىرنەشە داۋىرگە كۋا بولعان تاريحي تۇلعا. ول ءوز مانسابىن كومسومول بەلسەندىسى رەتىندە حرۋشيەۆ زامانىندا باستاپ، ارادا 60 جىلدان استام ۋاقىت وتكەننەن كەيىن قىزمەتتەن كەتتى. قازاقستاننىڭ تاۋەلسىز مەملەكەت بولىپ قالىپتاسۋىنا قوسقان ۇلەسىن ءبارى بىلەدى. ول - ءادىل تاريحي باعاسىن الۋعا لايىق ادام.
مەن مەمۋارلاردى، پۋبليتسيستيكالىق شىعارمالاردى، ساياسي وچەركتەردى ءاردايىم ىجداعاتپەن وقيمىن. ال سۇراققا كەلسەك، مەن ءۇشىن قازىرگى كەزەڭ مەمۋار جازىپ وتىراتىن ۋاقىت ەمەس»، - دەدى قاسىم-جومارت توقايەۆ.
ەسكە سالا كەتسەك، وتكەن ايدا تۇڭعىش پرەزيدەنت نۇرسۇلتان نازاربايەۆ «مەنىڭ ءومىرىم. بوداندىقتان بوستاندىققا» اتتى ءومىرباياندىق كىتابىن شىعارعان ەدى.
اۆتور
ايجان سەرىكجان قىزى
