قاسىم-جومارت توقايەۆ كونگومەن ىنتىماقتاستىقتى دامىتۋعا بولاتىن سالالاردى اتادى

استانا. KAZINFORM - قازاقستان مەن كونگو ىنتىماقتاستىعىنىڭ الەۋەتى وتە جوعارى. بۇل تۋرالى اقوردادا كونگو رەسپۋبليكاسىنىڭ پرەزيدەنتى دەني ساسسۋ-نگەسسومەن كەڭەيتىلگەن قۇرامداعى كەلىسوز بارىسىندا مەملەكەت باسشىسى قاسىم-جومارت توقايەۆ ايتتى.

«ءسىزدىڭ قازاق جەرىنە العاشقى ساپارىڭىز ەكى ەل اراسىنداعى ديپلوماتيالىق قارىم-قاتىناستىڭ 25 جىلدىعىمەن تۇسپا-تۇس كەلىپ وتىر. بۇل - مەرەيلى مەجە. شيرەك عاسىر ىشىندە ءبىز ءوزارا سەنىم مەن دوستىققا نەگىزدەلگەن ىنتىماقتاستىق ورناتتىق. ءبىز بولاشاقتا دا وسى سەرىكتەستىكتى نىعايتا تۇسكىمىز كەلەدى. بۇگىنگى كەلىسسوزدەر قازاقستان مەن كونگو قاتىناستارىن جاڭا بەلەسكە كوتەرىپ، ءتيىمدى ارىپتەستىك ورناتۋعا مۇمكىندىك بەرمەك»، - دەدى پرەزيدەنت.

مەملەكەت باسشىسى قازاقستان كونگو رەسپۋبليكاسىن افريكا قۇرلىعىنداعى ماڭىزدى سەرىكتەس رەتىندە قاراستىراتىندىعىن اتاپ ءوتتى.

«ەكى ەل ءبىر-بىرىنەن قاشىقتا ورنالاسقان. سوعان قاراماستان ءوزارا بايلانىستى جان-جاقتى دامىتۋعا مۇددەلىمىز. قازاقستان مەن كونگو ىنتىماقتاستىعىنىڭ الەۋەتى وتە جوعارى. اسىرەسە، ساۋدا-ەكونوميكا، اۋىل شارۋاشىلىعى، كولىك-لوگيستيكا، تاۋ-كەن، ءوندىرىس پەن ينۆەستيتسيا، جاڭا تەحنولوگيالار مەن عارىشتى يگەرۋ باعىتتارى بويىنشا ەكى ەل اراسىنداعى ىنتىماقتاستىقتى جانداندىرۋعا بولادى. بۇگىن قول قويىلاتىن قۇجاتتار ەكى ەل اراسىنداعى ىنتىماققا تىڭ سەرپىن بەرەدى. ءبىز بۇعان دالەل رەتىندە كونگوداعى ەلشىمىزدى تاعايىندايمىز. ەلشى ەكى ەلدىڭ اراسىندا ساياسي ارااعايىن بولادى»، - دەدى قاسىم-جومارت توقايەۆ.

اۆتور

مارلان جيەمباي