قارىزعا سالىنعان جولدار بيۋدجەت قارجىسىنا سالىنعان جولدان 3 ەسە قىمبات - اۋديت
استانا. KAZINFORM - اۆتوجول سالاسىندا شۇعىل شەشىمدەر قابىلداۋدى تالاپ ەتەتىن جۇيەلى كەمشىلىكتەر انىقتالدى. بۇل تۋرالى جوعارى اۋديتورلىق پالاتا ءتوراعاسى ءاليحان سمايىلوۆ ءمالىم ەتتى.

ونىڭ ايتۋىنشا، سوڭعى ءتورت جىلدا اۆتوموبيل جولدارىن سالۋعا، رەكونسترۋكسيالاۋعا جانە كۇتىپ- ۇستاۋعا 1,9 تريلليون تەڭگە ءبولىندى. اۋديت دەرەكتەرى بويىنشا، جاقسى جانە قاناعاتتانارلىق جاعدايداعى رەسپۋبليكالىق ماڭىزى بار اۆتوجولدار ۇلەسى % 72 قۇرايدى.
«اۆتوجولداردىڭ بۇزىلۋىنا اكەلەتىن نەگىزگى فاكتورلار - رۇقسات ەتىلگەن ماسسادان اساتىن اۋىر سالماقتى كولىكتىڭ ءجۇرۋى. بۇل - تاسىمالداۋ پروتسەسىنىڭ جەكەلەگەن توپتاردىڭ مۇددەلەرىن قورعاۋ جانە پرينتسيپتى پوزيتسيانىڭ بولماۋىنان جىلدار بويى شەشىلمەي كەلە جاتقان ماسەلە»، - دەدى ءا. سمايىلوۆ ءماجىلىستىڭ جالپى وتىرىسىندا.
سپيكەر اۆتوماتتاندىرىلعان ولشەۋ ستانسيالارى بۇل بۇزۋشىلىقتاردى دۇرىس راسىمدەمەيتىنىن اتاپ ءوتتى. جالپىعا ورتاق پايدالانىلاتىن جولداردا اۋىر سالماقتى كولىكتەردىڭ جۇرۋىنە قاتاڭ تىيىم سالىنۋى كەرەك. سونداي- اق مەملەكەتكە كەلتىرىلگەن زالال ءۇشىن جاۋاپتىلىقتى كۇشەيتۋ قاجەت.
ونىڭ ۇستىنە جوبالاۋ- سمەتالىق قۇجاتتامانى ازىرلەۋدى جانە ساراپتاما جاساۋدى تالاپ ەتپەيتىن ورتاشا جوندەۋ جوبالارى جولداردىڭ جاي- كۇيىنىڭ ناشارلاۋىنا اسەر ەتۋدە.
«مەملەكەتتىڭ كەپىلدىگىمەن الىنعان حالىقارالىق قارىزدار بويىنشا جوبالاردى باسقارۋ ساپاسىنىڭ تومەن ەكەنى جانە ولاردى ىسكە اسىرۋ مەرزىمدەرىنىڭ ۇزاققا سوزىلعانى انىقتالدى. بۇل تولەنگەن جانە يگەرىلمەگەن اۆانستارعا قىزمەت كورسەتكەنى ءۇشىن سىياقى تولەۋ ارقىلى بيۋدجەتتىڭ شامامەن 40 ميلليارد تەڭگەگە شىعىنعا ۇشىراۋىنا؛ جوبالاردىڭ 294 ميلليارد تەڭگەگە قىمباتتاۋىنا؛ «قازاۆتوجول» ا ق جۇمسالعانى راستالماعان 21 ميلليارد تەڭگە شىعىندارىن تولەۋگە اكەلدى»، - دەيدى ءا. سمايىلوۆ.
مەملەكەتتىڭ كەپىلدىگىمەن تارتىلعان قاراجاتتىڭ قول جەتكىزىلگەن ناتيجەلەرىنە ءتيىستى باعالاۋ جۇرگىزىلمەيدى. وسى قاراجاتقا ىسكە اسىرىلاتىن جوبالاردىڭ وزىندىك قۇنىن ىقتيمال ارزانداتۋ بويىنشا تالداۋ جاسالمايدى.
«مىسالى، كەپىلدەندىرىلگەن قارىز ەسەبىنەن سالىنعان ءبىر ك م جولدىڭ قۇنى بيۋدجەت قاراجاتىنا سالىنعان جولدان 3 ەسە قىمبات. قۇرىلىس ماتەريالدارىنىڭ تاپشىلىعى جانە ساپاسىنىڭ تومەندىگى جول سالۋدىڭ جانە جوندەۋدىڭ وزىندىك قۇنىنا دا، اۆتوجول سالاسىنىڭ جوبالارىن ۋاقىتىلى ىسكە اسىرۋعا دا تەرىس اسەر ەتەدى»، - دەپ سىنعا الدى سپيكەر.
بۇعان دەيىن ءا. سمايىلوۆ تەمىرجول سالاسىنداعى اۋديتتى بايانداپ، قتج دەفولتقا ۇشىراۋى مۇمكىن ەكەنىن، بار پايدا جەكە تاسىمالداۋشىلاردا ەكەنىن ايتقان ەدى.
اۆتور
ايجان سەرىكجان قىزى