نيۋ-يوركتەگى ورتالىق ساياباقتان دا كوپ: الماتىدا ءبىر ايدا 30 مىڭ اعاش وتىرعىزىلدى
الماتى. KAZINFORM - «الماتى -ءبىزدىڭ ورتاق ءۇيىمىز» ناۋقانى باستالعالى بەرى مەگاپوليستە 30 مىڭنان استام جاپىراقتى اعاش جانە 5 مىڭ بۇتا وتىرعىزىلدى.
الماتى اكىمدىگى اتاپ وتكەندەي، بۇل نيۋ-يوركتىڭ ايگىلى ورتالىق ساياباعىنداعى اعاشتان دا كوپ. وندا 18 - 25 مىڭ ءتۇپ اعاش بار. كوبىنەسە الەمدە جاپىراقتى اعاشتاردان تۇراتىن ۇلكەن ساياباقتار «قالانىڭ وكپەسى» سانالادى.
الماتى اكىمى ەربولات دوسايەۆتىڭ باستاماسىمەن اعاشتاردى جاپپاي وتىرعىزۋ 27-ساۋىردە ءوتتى. اكسيا بارىسىندا قالانىڭ 8 اۋدانىندا بارلىعى 8205 جاسىل جەلەك، ونىڭ ىشىندە 4 مىڭنان استام الما اعاشى وتىرعىزىلدى.
سونىمەن قاتار «جاسىل اۋلا» اكسياسى اياسىندا قالا تۇرعىندارىنا 3 مىڭ كوشەت، «الماتى - باق قالا» جالپى قالالىق اكسياسى بارىسىندا 8 مىڭنان استام كوشەت تاراتىلدى.
بيىل 19-ساۋىردە بارلىق جالپى ءبىلىم بەرەتىن مەكتەپتەردە «مەكتەپ اۋلاسىنىڭ وازيسى» لاندشافتى ديزاين فەستيۆالى ءوتتى. فەستيۆال اياسىندا 5-11-سىنىپ وقۋشىلارى 20 مىڭنان استام گۇل، 430 جەمىس اعاشى جانە 200 تۋيا كوشەتىن وتىرعىزدى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسىمەن ەلدى مەكەن اۋماعىن اباتتاندىرۋ جانە كوگالداندىرۋ تۋرالى «تازا قازاقستان» اكسياسى اياسىندا الماتى قالاسى اكىمدىگى 2024 -جىلعى 8 -ءساۋىر مەن 8 -مامىر ارالىعىندا «الماتى - ءبىزدىڭ ورتاق ءۇيىمىز» ناۋقانىن وتكىزدى.
ناۋقاننىڭ نەگىزگى ماقساتى - قالا ينفراقۇرىلىمىنا ۇقىپتى قاراۋ قۇندىلىعىن قالىپتاستىرۋ، حالىقتى جوعارى ازاماتتىق جاۋاپكەرشىلىك پەن ەكولوگيالىق مادەنيەتكە تاربيەلەۋ.
اۆتور
الما مۇقانوۆا
