موبيلدى اۋدارىم شەگى 1 ميلليون تەڭگە: قازاقستاندىقتارعا الاڭداۋعا سەبەپ بار ما

استانا. KAZINFORM - قارجى ۆيتسە- ءمينيسترى داۋرەن كەڭبەيىل موبيلدى اۋدارىمدار بويىنشا 1 ميلليون تەڭگە شەكتەۋ قويۋ تۋرالى باستاماعا قاتىستى تۇسىنىك بەردى.

ونىڭ ايتۋىنشا، اڭگىمە ءۇش اي ىشىندەگى موبيلدى اۋدارىمداردىڭ جيىنتىق سوماسىنا قاتىستى بولىپ وتىر.

- بۇل كورسەتكىش مەملەكەتتىك كىرىستەر كوميتەتى تاراپىنان رەپرەزەنتاتيۆتى دەرەكتەر نەگىزىندە قالىپتاستىرىلدى. ارىپتەستەر بۇل سومانى قاۋىپسىز دەڭگەي دەپ سانايدى. شەشىم الدىن الا ەكونوميكالىق ساياسات جونىندەگى كەڭەستە ماقۇلداندى. ءبىراق، شەشىم ءالى دە تالقىلانىپ جاتىر، - دەدى داۋرەن كەڭبەيىل ۇكىمەت وتىرىسىنان كەيىن وتكەن باسپا ءسوز ءماسليحاتىندا.

سونداي-اق ب ا ق وكىلدەرى قارجى ۆيتسە-مينيسترىنەن ازاماتتار تۇراقتى تۇردە تۋىستارىنان اۋدارىم الىپ وتىرسا، نە ىستەۋ كەرەك ەكەنىن سۇرادى.

- ەگەر ءسىز كاسىپكەر بولماساڭىز جانە اۋدارىمنىڭ تۋىستارىڭىزدان تۇسكەنىن تۇسىندىرە الساڭىز، ەشقانداي سۇراق تۋىندامايدى. بۇل شەكتەۋ جۇيەلى تۇردە، ونىڭ ىشىندە بيزنەس اياسىنداعى اۋدارىمدارعا قاتىستى. ەگەر قاراجاتتىڭ كاسىپكەرلىك قىزمەتكە قاتىسى جوق ەكەنىن راستاي الساڭىز، ماسەلە جوق، - دەپ ءتۇسىندىردى ءمينيستردىڭ ورىنباسارى.

وسى ورايدا داۋرەن كەڭبەيىل بيزنەس وكىلدەرىنە موبيلدى اۋدارىم بويىنشا 1 ميلليون تەڭگە شەگىن بەلگىلەۋدەگى باستامانىڭ ماقساتى - كولەڭكەلى تابىس كوزدەرىن زاڭداستىرۋ جانە ادال كاسىپكەرلەردى قورعاۋ ەكەنىن اتاپ ءوتتى.

جىل باسىندا مەملەكەتتىك كىرىستەر كوميتەتى موبيلدى اۋدارىمدارعا قاتىستى، جاسىرىن تابىس ەرتەلى-كەش انىقتالاتىنىن حابارلاعان ەدى.

ەسكە سالساق، ءماجىلىس دەپۋتاتى ازات پەرۋاشيەۆ موبيلدى اۋدارىمداردىڭ شەگىن 255 مىڭنان 1 ميلليون تەڭگە كوتەرۋدى ۇسىندى.

اۆتور

داۋلەت ىزتىلەۋ