مۇناي-گاز حيمياسى: ەلىمىزدە بولاشاعى زور 4 جوبا جۇزەگە اسىرىلىپ جاتىر

استانا. KAZINFORM – ق ر ە م مۇناي-گاز-حيميا جانە تەحنيكالىق رەتتەۋ دەپارتامەنتىنىڭ ديرەكتورى تەمىرلان ۇركىمبايەۆ ەلىمىزدە مۇناي-گاز حيمياسى سالاسىندا اتقارىلىپ جاتقان ءبىرقاتار ماڭىزدى جوبانى اتادى.

- مۇناي-گاز حيمياسى سالاسىندا ءبىرقاتار كەلەشەگى زور جوبالار جۇزەگە اسىرىلىپ جاتىر. اتاپ ايتساق، اقتوبە وبلىسىندا كارباميد ءوندىرىسى (ىسكە قوسىلۋى - 2029 -جىلى)، الكيلات ءوندىرىسى (ىسكە قوسىلۋى - 2027 -جىلى)، بۋتاديەن ءوندىرىسى (ىسكە قوسىلۋى - 2028 -جىلى) ، سونداي- اق اقتاۋدا اممياك- كارباميد كەشەنى (ىسكە قوسۋ — 2029 -جىلى) ىسكە قوسىلادى. قازىرگى تاڭدا بۇل جوبالاردىڭ اتقارىلۋ بارىسى بازالىق جوبالىق قۇجاتتامانى ازىرلەۋدەن باستاپ قارجىلاندىرۋ تەتىكتەرىن پىسىقتاۋعا دەيىنگى ءارتۇرلى ساتىدا تۇر، - دەدى ول Power Central Asia + China وڭىرلىك ەنەرگەتيكالىق فورۋمىندا.

ايتا كەتەيىك، كارباميد - اۋىل شارۋاشىلىعىندا اسا سۇرانىسقا يە ازوتتى تىڭايتقىش، ال الكيلات - بەنزيننىڭ جوعارى وكتاندى كومپونەنتى. سونداي-اق بۋتاديەن - اۆتوكولىك ونەركاسىبىندە، شينا، پلاستيك جانە رەزەڭكە بۇيىمدارىن وندىرۋدە قولدانىلاتىن سينتەتيكالىق كاۋچۋك.

2029 -جىلى قۋاتى 1,25 ميلليون توننا بولاتىن پوليەتيلەن زاۋىتى ىسكە قوسىلادى.