مەملەكەتتىك ۋنيۆەرسيتەتتەردە وقۋ اقىسى وسە مە - مينيستر جاۋابى

استانا. KAZINFORM - مەملەكەتتىك ۋنيۆەرسيتەتتەردە وقۋ اقىسى وسپەيدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى.

بۇگىن پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر «بيىل وقۋ اقىسى وسە مە؟» دەپ سۇرادى.

ءوز كەزەگىندە مينيستر مەملەكەتتىك ۋنيۆەرسيتەتتەردە وقۋ قۇنى بىلتىر جانە وسى جىلى ءبىر دەڭگەيدە ەكەنىن ايتتى.

- مەملەكەتتىك جوعارى وقۋ ورىندارىندا (بيىل) ءبىر دەڭگەيدە ۇستاپ تۇرمىز، - دەدى س. نۇربەك.

ونىڭ سوزىنە قاراعاندا، جاڭا وقۋ جىلىنا 78 مىڭعا جۋىق گرانت باكالاۆرياتقا بولىنەدى. ال ماگيستراتۋرا مەن دوكتورانتۋرانى قوسا ەسەپتەگەندە، 100 مىڭ گرانتقا جاقىندايدى.

- جىل سايىن ەلىمىزدە گرانت سانىن كوبەيتىپ جاتىرمىز. بۇل تۇرعىدا ءوسىپ كەلە جاتقان حالىق سانىنا وراي ستۋدەنتتەردى قامتۋعا تىرىسىپ وتىرمىز. سونىمەن قاتار، قوسىمشا ءتورت تەتىكتى ىسكە قوسقانىمىزدى بىلەسىزدەر. «ۇلتتىق قور - بالالارعا» جوباسى بويىنشا بالالاردىڭ ەسەپ-شوتىنا قارجى اۋدارىلىپ جاتىر. «كەلەشەك» جيناق قورى تولىققاندى ىسكە قوسىلدى، - دەدى ۆەدومستۆو باسشىسى.

بۇعان دەيىن شەتەلدىكتەر نەلىكتەن قازاقستاننىڭ جوعارى وقۋ ورىندارىن تاڭدايتىنىن جازعان ەدىك.

اۆتور

رۋسلان عابباسوۆ