مەملەكەتتىك كەڭەسشى بالالاردىڭ قۇقىعىن قورعاۋ جونىندە رەسپۋبليكالىق كەڭەس وتكىزدى
استانا. KAZINFORM - ەرلان قاريننىڭ توراعالىعىمەن بالالاردىڭ قۇقىعىن قورعاۋ جونىندە رەسپۋبليكالىق كەڭەس ءوتتى. وعان وبلىس اكىمدەرىنىڭ ورىنباسارلارى قاتىستى. بۇل تۋرالى اقوردا ءمالىم ەتتى.
كەڭەستە كامەلەت جاسىنا تولماعاندارعا بايلانىستى قۇقىق بۇزۋشىلىقتىڭ الدىن الۋ، بالالاردىڭ قاۋىپسىزدىگىن تولىق قامتاماسىز ەتۋ، سونداي-اق ولاردىڭ جازعى دەمالىستارىن ۇيىمداستىرۋ ماسەلەلەرى تالقىلاندى. سونىمەن قاتار «ادال ازامات» ءبىرتۇتاس تاربيە بەرۋ باعدارلاماسىن جۇزەگە اسىرۋ جانە ونى مەكتەپتەرگە ەنگىزۋ بارىسى پىسىقتالدى.
باسقوسۋدا وقۋ-اعارتۋ، ىشكى ىستەر، توتەنشە جاعدايلار، دەنساۋلىق ساقتاۋ مينيسترلىكتەرىنىڭ باسشىلارى، باس پروكۋروردىڭ ورىنباسارى، بالا قۇقىقتارى جونىندەگى ۋاكىل جانە ءبىرقاتار وبلىس اكىمىنىڭ ورىنباسارلارى بايانداما جاسادى.
وتىرىستا بالالاردىڭ قۇقىقتارىن قورعاۋعا جانە قاۋىپسىزدىگىن قامتاماسىز ەتۋگە قاتىستى ماسەلەلەر مەن وسى باعىتتا قولعا الىنعان شارالار تۋرالى ايتىلدى.
مەملەكەتتىك كەڭەسشى بۇگىندە ەلىمىزدە بالالاردىڭ قۇقىعىن قورعاۋ مەن قاۋىپسىزدىگىن ساقتاۋ بويىنشا ءتيىمدى ينستيتۋتسيونالدىق جانە زاڭنامالىق جۇيە قالىپتاسقانىن اتاپ ءوتتى. بۇعان بالالاردىڭ قۇقىعىن قورعاۋعا جانە قاۋىپسىزدىگىن قامتاماسىز ەتۋگە ايرىقشا ءمان بەرەتىن مەملەكەت باسشىسىنىڭ بەرىك ۇستانىمى زور ىقپالىن تيگىزدى.
جيىن سوڭىندا ەرلان قارين اتالعان باعىتتا ۇيلەسىمدى جۇمىس ىستەۋدىڭ، سونداي-اق وعان اتا-انالار قاۋىمداستىعىن تارتۋدىڭ ماڭىزىنا توقتالدى. مەملەكەتتىك كەڭەسشى بالالار مەن جاس وسپىرىمدەردىڭ قاۋىپسىزدىگىن تولىق قامتاماسىز ەتۋدى جاۋاپتى مەملەكەتتىك ورگاندار مەن وبلىس باسشىلىعى جۇيەلى تۇردە باقىلاۋدا ۇستاۋعا ءتيىس ەكەنىن جەتكىزدى. سونداي-اق بالالاردىڭ قاۋىپسىزدىگىن قامتاماسىز ەتۋ مەملەكەتتىك ورگاندار جۇمىسىنىڭ تيىمدىلىگىن ايقىندايتىن نەگىزگى كورسەتكىشتىڭ ءبىرى ەكەنىنە نازار اۋداردى.
ەسكە سالا كەتەيىك، بۇعان دەيىن ق ر مەملەكەتتىك كەڭەسشىسى ەرلان قارين كونستيتۋتسيالىق رەفورمانىڭ ناتيجەلەرى تۋرالى ايتقان ەدى.
