مەملەكەت باسشىسى: وبلىستاعى باستى مىندەتتىڭ ءبىرى - تۇرعىنداردى تازا اۋىز سۋمەن قامتاماسىز ەتۋ

استانا. KAZINFORM - مەملەكەت باسشىسى ۇكىمەت پەن «سامۇرىق-قازىنا» قورىنا ايماقتاعى سۋ تاپشىلىعىن ازايتۋ ءۇشىن ناقتى شەشىم قابىلداۋدى تاپسىردى، دەپ حابارلايدى اقوردانىڭ باسپا ءسوز قىزمەتى.

ونىڭ سوزىنشە، ەڭ اۋەلى ءوڭىر تۇرعىندارىن تازا اۋىز سۋمەن قامتاماسىز ەتۋ قاجەت.

 - ءبىرىنشى. وبلىستاعى باستى مىندەتتىڭ ءبىرى - تۇرعىنداردى تازا اۋىز سۋمەن قامتاماسىز ەتۋ. تابيعي وسىمگە جانە كوشى- قون ۇدەرىسىنە بايلانىستى ايماقتاعى حالىق سانى ۇزدىكسىز ءوسىپ كەلەدى. بۇل ماسەلە بويىنشا مەن جاڭا دا ايتىپ كەتتىم. سوندىقتان اۋىز سۋ ماسەلەسىنىڭ وزەكتىلىگى كۇن وتكەن سايىن ارتا تۇسەدى. م ا ە ك- ءتىڭ سۋ تۇشىتۋ قۋاتى جەتكىلىكسىز بولىپ تۇرعانىن بىلەمىز. سونىڭ كەسىرىنەن اسىرەسە، جاز ايلارىندا اۋىز سۋ تاپشىلىعى قاتتى سەزىلەدى. ءۇش قالاعا جانە ورتالىق قۇبىر جەلىسى بار 59 ەلدى مەكەنگە اۋىز سۋ بەلگىلى ءبىر ۋاقىتتا عانا بەرىلەدى. سۋ تاپشىلىعى - كۇنىنە 23 مىڭ تەكشە مەتر، - دەدى پرەزيدەنت.

توقايەۆ قازىر سۋ تۇشىتاتىن 6 زاۋىت پەن قوندىرعى سالىنىپ جاتقانىن ايتتى.

- كەندىرلىدەگى جوبا ىسكە قوسىلعان سوڭ، جاڭاوزەن قالاسىنىڭ، تەڭگە، قىزىلساي، راحات جانە كەندىرلى اۋىلدىق وكرۋگتەرىنىڭ تۇرعىندارىن تازا سۋمەن قامتاماسىز ەتۋگە مۇمكىندىك تۋادى. سونداي- اق قوسىمشا جۇمىس ورىندارى اشىلادى. بۇل جوبانى كەشىكتىرمەي، دەر كەزىندە، ياعني، مامىر ايىندا اياقتاۋ كەرەك. 2023 -جىلى «استراحان - ماڭعىشلاق» ماگيسترالدى سۋ قۇبىرى جاڭعىرتىلدى. ونىڭ سۋ وتكىزۋ مۇمكىندىگى كۇنىنە 110 مىڭنان 170 مىڭ تەكشە مەترگە دەيىن ارتتى. ءبىراق بۇل قۇبىر باتىس ايماقتىڭ سۋعا سۇرانىسىن تولىق وتەي المايدى. ونىڭ ۇستىنە، قۇبىر ارقىلى كەلەتىن سۋدى ابدەن تازارتۋ كەرەك. سوندىقتان سۋدىڭ وزىندىك قۇنى قىمباتقا تۇسەدى. ۇكىمەت «سامۇرىق- قازىنا» قورىمەن بىرگە وسى ايماقتاعى سۋ تاپشىلىعىن ازايتۋ ءۇشىن ناقتى شەشىم قابىلداۋعا ءتيىس، - دەدى مەملەكەت باسشىسى.

پرەزيدەنت ايماقتاعى سۋ قۇبىرى مەن كارىز جەلىسىنىڭ توزۋىن اسا كۇردەلى ماسەلە دەپ اتادى.

- ساراپشىلار تازا سۋدىڭ تاعى ءبىر كوزى بار دەيدى. بۇل - اقتوبە وبلىسىنداعى كوكجيدە جەراستى سۋلارى. ونى يگەرۋگە قاتىستى جوبانى جان-جاقتى پىسىقتاپ، ونىڭ ەكونوميكالىق تيىمدىلىگىن زەرتتەۋ قاجەت، - دەدى مەملەكەت باسشىسى.

سونداي-اق پرەزيدەنت ساراپشىلاردىڭ كوكجيدە، ايشۋاق جانە سولتۇستىك ايشۋاق جەراستى سۋلارىنان ماڭعىستاۋ جانە اتىراۋ وبلىستارىنىڭ ەلدى مەكەندەرىنە دەيىن سۋ قۇبىرىن تارتۋدى ۇسىنىپ وتىرعانىن جەتكىزدى.

سۋ قۇبىرىنىڭ ۇزىندىعى شامامەن 1400 شاقىرىم بولادى، سۋ وتكىزۋ مۇمكىندىگى - كۇنىنە 170 مىڭ تەكشە مەتر. سول ارقىلى 1,2 ميلليون ادامدى تازا اۋىز سۋمەن قامتاماسىز ەتۋگە جانە ونىڭ كولەمىن ارتتىرۋعا مۇمكىندىك تۋادى. اقتاۋ قالاسىنداعى سۋ قۇبىرى جەلىسى ابدەن توزعان، توزۋ كورسەتكىشى - 77 پايىز. سونىڭ كەسىرىنەن سۋدىڭ 16 پايىزى ىسىراپ بولىپ جاتىر. جالپى، ايماقتاعى سۋ قۇبىرى مەن كارىز جەلىسىنىڭ توزۋى اسا كۇردەلى ماسەلە بولىپ تۇر.

- ماسەلەن، سۋ قۇبىرى اقتاۋدا جاڭا ايتتىم، 77 پايىز، جاڭاوزەندە - 59 پايىز توزعان. كارىز جەلىسى اقتاۋدا شامامەن - 76 پايىز، جاڭاوزەندە - 72 پايىز توزعان. ءبىر سوزبەن، ناقتى شارالار قولعا الىنۋى كەرەك. ال شالعايدا تۇراتىن مالشىلاردىڭ ءوز بەتىمەن قۇدىق قازۋ تۋرالى باستاماسىنا كەلسەك، بۇل - جالپى قۇپتارلىق ءىس. بۇل جۇمىسقا 100 ميلليون تەڭگە قاجەت دەپ وتىر. كەمىندە 50 مالشى سۋعا قول جەتكىزەدى ەكەن. قولداۋعا بولادى دەپ ويلايمىن. پرەمەر-ءمينيستردىڭ ورىنباسارى قانات بوزىمبايەۆ اكىممەن بىرلەسىپ بۇل ماسەلەنى پىسىقتاۋى كەرەك، - دەدى مەملەكەت باسشىسى.

ايتا كەتەيىك، مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس باستالدى.