مەملەكەت باسشىسى باس پروكۋرور بەرىك اسىلوۆتى قابىلدادى

استانا. KAZINFORM - پرەزيدەنتكە ەلىمىزدەگى زاڭدىلىقتىڭ ساقتالۋى مەن قۇقىقتىق ءتارتىپتىڭ جاي- كۇيى، قاداعالاۋ ورگانىنىڭ باسىم باعىتتارداعى قىزمەتى جونىندە مالىمەت بەرىلدى.

باس پروكۋرور ينۆەستيتسيالىق جوبالاردى قولداۋ تۋرالى باياندادى. بەرىك اسىلوۆتىڭ ايتۋىنشا، ەل ەكونوميكاسىنا 8,3 تريلليون تەڭگە قارجى قۇيعان 445 ينۆەستورعا قۇقىقتىق كومەك كورسەتىلگەن. «پروكۋرورلىق سۇزگى» جوباسى اياسىندا مەملەكەتتىك ورگانداردىڭ ينۆەستورلارعا قارسى 500 شەشىمى بەكىتىلگەن جوق. قابىلدانعان شارالار ينۆەستورلاردىڭ مەملەكەتتىك بيلىك ينستيتۋتتارىنا دەگەن سەنىمىن ارتتىرا تۇسۋگە مۇمكىندىك بەردى.

قاسىم-جومارت توقايەۆقا اكتيۆتەردى قايتارۋ جۇمىستارى تۋرالى باياندالدى. بيىل پروكۋراتۋرا ورگاندارى جالپى قۇنى 262 ميلليارد تەڭگە، سونىڭ ىشىندە شەتەلدەن 205 ميلليون دوللارعا باعالانعان اكتيۆتەردى قايتارعان. اكتيۆتەردى باسقارۋ كومپانياسىنا كاسىپورىندارداعى قۇنى 82 ميلليارد تەڭگە بولاتىن مۇلىك پەن ۇلەستەر بەرىلدى. جالپى سوماسى 450 ميلليارد تەڭگەگە تەڭ اكتيۆتەردى قايتارۋ تۋرالى كەلىسىم ماقۇلداندى.

مەملەكەت باسشىسىنىڭ جولداۋىندا ايتىلعان زاڭسىز بەرىلگەن جانە پايدالانىلماي جاتقان اۋىل شارۋاشىلىعى القاپتارىن قايتارۋ جونىندەگى تاپسىرماسى ورىندالىپ جاتىر. باس پروكۋرور سوڭعى 4 جىلدا مەملەكەتكە 17 ميلليون گەكتار جەر قايتارىلىپ، اينالىمعا ەنگىزىلگەنىن جەتكىزدى. جايىلىم تاپشىلىعى 29 ميلليون گەكتاردان 8 ميلليون گەكتارعا دەيىن، ياعني 4 ەسە قىسقاردى، جەرگە ۇلەسى بار 11 مىڭ ادامنىڭ قۇقىعى قورعالدى.

بۇدان بولەك، بەرىك اسىلوۆ قاسىم-جومارت توقايەۆتى اتىشۋلى ءبىرقاتار قىلمىستىق ءىستىڭ تەرگەلۋ بارىسىنان حاباردار ەتتى.

سونىمەن قاتار مەملەكەت باسشىسىنا ەسىرتكى قىلمىسىنا قارسى كۇرەستىڭ جاي-كۇيى جونىندە اقپارات بەرىلدى. جىل باسىنان بەرى ەسىرتكى ساتۋدىڭ 1573 فاكتىسى انىقتالدى. بۇدان بولەك 15 توننادان استام ەسىرتكى تاركىلەنگەن، سونىڭ ىشىندە 1 توننا سينتەتيكالىق ەسىرتكى بار. 60-قا جۋىق ەسىرتكى زەرتحاناسى جويىلىپ، 13 ۇيىمداسقان قىلمىستىق توپتىڭ ارەكەتىنە توسقاۋىل قويىلدى.

مەملەكەت باسشىسى «ادىلەتتى قازاقستان» تۇجىرىمداماسىندا ايقىندالعان «زاڭ جانە ءتارتىپ» باعدارىن نىعايتۋ ىسىنە پروكۋراتۋرا ورگاندارىنىڭ كۇش-جىگەرىن بارىنشا جۇمىلدىرۋدى، اسىرەسە، زاڭعا قايشى كەز كەلگەن ارەكەت ءۇشىن جازادان جالتارۋعا جول بەرمەۋدى تاپسىردى.

اۆتور

ابىلايحان جۇماشيەۆ