مۇگەدەكتىكتى بەلگىلەۋ بويىنشا 62 مىڭعا جۋىق ءوتىنىم سىرتتاي فورماتتا قارالدى
استانا. KAZINFORM - جىلدىڭ باسىنىن باستاپ مۇگەدەكتىك توبىن بەلگىلەۋ ءۇشىن مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى بويىنشا پيلوتتىق جوبانى ىسكە اسىرۋ شەڭبەرىندە قازاقستاننىڭ بارلىق وڭىرىنەن 61,9 مىڭ ءوتىنىم قارالدى. بۇگىندە سىرتتاي فورماتتا كۋالاندىرۋ 30 نوزولوگيالىق نىسان بويىنشا جۇرگىزىلەدى.
ەڭبەك جانە حالىقتى الەۋمەتتىك قورعاۋ مينيسترلىگى باسپا ءسوز قىزمەتىنىڭ حابارلاۋىنشا، 2024 -جىلى 96,9 مىڭنان استام ءوتىنىم سىرتتاي فورماتتا قارالعان. بۇل كۋالاندىرۋدان وتكەن مۇگەدەكتىگى بار ادامداردىڭ جالپى سانىنىڭ %37,4- ىن قۇرايدى.
بۇعان دەيىن حابارلانعانداي، ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا قولايلى جاعداي جاساۋدى، ولاردىڭ ينستانسيالار مەن قاعازباستىلىق بويىنشا ءجۇرۋىن، سونداي-اق كورسەتىلەتىن قىزمەتتى بەرۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى.
وسى تاپسىرمانى ورىنداۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ مەن سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىكتەرىمەن بىرلەسىپ قازاقستاننىڭ بارلىق 20 وڭىرىندە پيلوتتىق رەجيمدە مەديتسينالىق- الەۋمەتتىك ساراپتاما (بۇدان ءارى - م ءا س) جۇرگىزۋدىڭ سىرتتاي فورماتى بويىنشا جوبانى ىسكە اسىرىپ جاتىر.
مۇگەدەكتىك توبىن بەلگىلەۋ جونىندەگى قىزمەتتى الۋ ءۇشىن ءوتىنىش بەرۋشىگە تۇرعىلىقتى جەرى بويىنشا ەمحاناعا جۇگىنۋ جانە قاجەتتى تەكسەرۋدەن ءوتۋ قاجەت، قالعان پروتسەستەر اقپاراتتىق جۇيەلەردى ينتەگراتسيالاۋ ەسەبىنەن ونىڭ قاتىسۋىنسىز وتەدى.
سىرتتاي كۋالاندىرۋعا كوشۋ:
- اكىمشىلىك جانە بيۋروكراتيالىق كەدەرگىلەردى جويادى؛
- م ءا س ساراپتامالىق شەشىمدەرىنىڭ اشىقتىعىن قامتاماسىز ەتەدى؛
- مۇگەدەكتىكتى بەلگىلەۋ جانە مۇگەدەكتىگى بار ادامداردى الەۋمەتتىك قورعاۋ شارالارىن انىقتاۋ بويىنشا قىزمەتتەردى ۇيدەن شىقپاي-اق الۋعا مۇمكىندىك بەرەدى؛
- كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسىن بولدىرمايدى، سول ارقىلى سىبايلاس جەمقورلىق تاۋەكەلدەرىن ازايتادى.
بۇعان دەيىن 1- شىلدەدەگى جاعداي بويىنشا جۇمىسپەن قامتۋعا جاردەمدەسۋدىڭ ءتۇرلى شارالارىمەن 15 مىڭنان استام مۇگەدەكتىگى بار ادام جۇمىسپەن قامتىلعانىن جازعان ەدىك.
