مارات احمەتجانوۆ قوسشى قالاسى ۇلەسكەرلەرىنىڭ پروبلەماسىن شەشۋگە ۋادە بەردى

استانا. KAZINFORM - اقمولا وبلىسىنىڭ اكىمى مارات احمەتجانوۆ قوسشى قالاسىنداعى تۇرعىن ءۇي ۇلەسكەرلەرى ماسەلەسىنىڭ تولىق شەشىلەتىنىن ايتىپ، سەندىردى.

- ءبىز ينۆەستور تاۋىپ، اكەلدىك، قازىر 9 قاباتتى 100 پاتەرلى تۇرعىن ءۇيدىڭ قۇرىلىسى باستالادى. قوسشىنىڭ قالا كۇنىنە اياقتاۋدى جوسپارلاپ وتىرمىز. جالپى بارلىق ۇلەسكەردىڭ ماسەلەسىن 100 پايىز شەشەمىز. بيىل جوسپار بويىنشا شەشەتىن بولامىز، سەبەبى سوت ۇكىمدەرى بار، قۇرىلتايشى تۇلعالار سوتتالدى، - دەدى مارات احمەتجانوۆ وبلىستىڭ الەۋمەتتىك- ەكونوميكالىق دامۋ بارىسى تۋرالى ەسەپ بەرە تۇرىپ.

ايتا كەتسەك، قوسشى قالاسىنداعى ۇلەستىك قۇرىلىس ماسەلەسى كوپ جىلدار بويى شەشىلمەي كەلەدى.

وسىلايشا وبلىس باسشىسى جاقىن ارادا بارلىق ۇلەسكەر ءوز پاتەرىن الاتىنىنا سەندىرىپ وتىر. دەسەك تە ماسەلە كەزەڭ-كەزەڭىمەن شەشىلەدى.

سونداي-اق مارات احمەتجانوۆ سالىنىپ جاتقان تۇرعىن ءۇي قۇرىلىسىمەن جەكە تانىسقانىن تىلگە تيەك ەتتى.

بۇعان دەيىن ءوڭىر باسشىسى كوكشەتاۋ قالاسىندا 150 ەسكى تۇرعىن ءۇي رەنوۆاتسيادان وتەتىنىن ايتتى.

ايتا كەتەيىك، بيىل اقمولا وبلىسىنىڭ شارۋالارى 6,6 ميلليون توننا رەكوردتىق استىق جينادى.

اۆتور

داۋلەت ىزتىلەۋ