م. جاكىشەۆتىڭ الاۋدا جانىپ جاتقان گاز مولشەرى تۋرالى مالىمەتى شىندىققا ساي ەمەس - ەنەرگەتيكا ءمينيسترى

استانا. KAZINFORM - ەنەرگەتيكا ءمينيسترى الماسادام ساتقاليەۆ «قازاتوم ونەركاسىپ» ۇلتتىق كومپانياسىنىڭ بۇرىنعى باسشىسى مۇحتار جاكىشەۆتىڭ قاشاعان، قاراشىعاناق، تەڭىز كەنىشتەرىندەگى مۇنايمەن ىلەسىپ شىعاتىن 8-9 ميلليارد تەكشە مەتر گاز الاۋ رەتىندە جانىپ كەتىپ جاتقانى تۋرالى مالىمەتتى تەرىسكە شىعاردى.

«قازاتوم ونەركاسىپ» ۇلتتىق كومپانياسىنىڭ بۇرىنعى باسشىسى مۇحتار جاكىشەۆ ا ە س- ءتىڭ ورنىنا گاز گەنەراتسياسىن سالۋدى ۇسىندى. ول ۇسىنىسقا نە ايتاسىز؟ ونىڭ ايتۋىنشا جىل سايىن ەلىمىزدە 8-9 ميلليارد تەكشە مەتر گاز اۋادا جانىپ كەتىپ جاتىر. بۇل راس پا؟» - دەپ سۇرادى جۋرناليست.

مينيستر بۇل ۇسىنىس ەسكەرۋگە جارامسىز دەپ ەسەپتەيتىنىن ايتتى.

«ونىڭ گاز گەنەراتسياسىن پايدالانۋ تۋرالى ۇسىنىسى ءبىزدىڭ كونتەكستەن ءتۇسىپ قالادى. ويتكەنى ول جاريا ەتكەن سيفرلار، 8-9 ميلليارد تەكشە مەتر گاز كەنىش الاۋلارىندا جانىپ كەتىپ جاتىر دەگەنى شىندىققا ساي كەلمەيدى. ياعني، ءبىز ءىس جۇزىندە ەڭ كوپ دەگەندە 340 ميلليون تەكشە مەتر گاز جاعامىز. بۇل بۇكىل گازدىڭ ءبىر پايىزىنان از. مۇنشا گاز گەنەراتسيا كوزى بولا المايدى. بىزدە گاز گەنەراتسياسىن دامىتۋدىڭ جۇيەلى جوسپارى بار. ول تۋرالى بۇعان دەيىن دە ايتىپ ءجۇرمىن»، - دەدى الماسادام ساتقاليەۆ.

اۆتور

ەسىمجان ناقتىباي