ەلىمىزدەگى شەتەل ۋنيۆەرسيتەتىن ءتامامداعان تۇلەكتەر قازاقستاندا جۇمىس ىستەۋگە مىندەتتەلەدى
استانا. KAZINFORM - ەلىمىزدەگى شەتەلدىك ۋنيۆەرسيتەتتەردىڭ فيليالدارىندا ءبىلىم العان وتاندىق جانە شەتەلدىك ستۋدەنتتەردىڭ ءبىلىم الۋعا قاتىستى قۇقىعى مەن مىندەتتەرى تەڭ.
بۇل تۋرالى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى جاننا ەسىنبايەۆا ءمالىم ەتتى.
«ەلىمىزدە فيليالدارى اشىلىپ جاتقان شەتەلدىك ۋنيۆەرسيتەتتەر الەمنىڭ ۇزدىك 500 ۋنيۆەرسيتەتى رەيتينگىسىنە، كەيبىرى توپ-100 تىزىمىنە كىرەدى. سوندىقتان فيليالدار جوعارى وقۋ ورىندارىن سارالاۋدىڭ ۇلتتىق جۇيەسىنە كىرمەيدى. جالپى قازاقستاندىق ج و و- دا بولسىن، شەتەلدىك ۋنيۆەرسيتەتتەردىڭ فيليالدارىندا بولسىن، ستۋدەنتتەر ءۇشىن ءبىلىم الۋ تەڭ قۇقىقتار مەن مىندەتتەردى كوزدەيدى. گرانت يەلەنگەن ستۋدەنتتەر وقۋىن اياقتاعان سوڭ بەلگىلى ءبىر مەرزىم قازاقستاندا (مەملەكەتتىك كاسىپورىنداردا نەمەسە جەكە سەكتوردا) جۇمىس ىستەۋ تالابى قويىلادى»، - دەيدى جاننا ەسىنبايەۆا اگەنتتىك جولداعان ساۋالعا جاۋاپ بەرە وتىرىپ.
ونىڭ ايتۋىنشا، اقىلى نەگىزدە وقىعان تۇلەكتەرگە ەلىمىزدە بەلگىلى ءبىر مەرزىمدە جۇمىس ىستەۋ مىندەتى جۇكتەلمەيدى. مينيسترلىكتىڭ مالىمەتىنە سۇيەنسەك، مەملەكەتتىك ءبىلىم بەرۋ تاپسىرىسى جوسپارىنا سايكەس 2024-2025 وقۋ جىلىنا شەتەلدىك ۋنيۆەرسيتەتتەر فيليالدارىندا ءبىلىم الاتىن ستۋدەنتتەرگە جالپى سانى 1635 مەملەكەتتىك گرانت ءبولىندى.
2025-2026 وقۋ جىلىنا – 1585، 2026-2027 وقۋ جىلىنا - 1335 گرانت ءبولۋ جوسپارلانىپ وتىر.
بۇعان دەيىن ەلىمىزدە اشىلىپ جاتقان شەتەل ۋنيۆەرسيتەتى فيليالدارىندا «قازاق ءتىلى» جانە «قازاقستان تاريحى» ءپانىن وقىتۋ مىندەتتەلەتىنى تۋرالى حابارلاعان ەدىك.
اۆتور
داۋلەت ىزتىلەۋ
