ەلىمىزدە قوس بيلىك جوق - ءماجىلىس ءتوراعاسى

ەلىمىزدە قوس بيلىك جوق. بۇل تۋرالى ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات.

بۇگىن ءماجىلىستىڭ جالپى وتىرىسىنان كەيىن ب ا ق وكىلدەرى تومەنگى پالاتا سپيكەرىنەن: «قوعامدا سىزدەر قۇرىپ جاتقان جاڭا قازاقستان مەن ەسكى قازاقستان اراسىندا تەكەتىرەس ءجۇرىپ جاتىر دەگەن پىكىر بار. وعان سەبەپ - ەكس- پرەزيدەنتتىڭ استانا كلۋبىن وتكىزۋى، ودان كەيىن رەسەيگە بارىپ پۋتينمەن كەزدەسۋى. حالىقتىڭ الاڭداۋىنا نەگىز بار ما؟»، - دەپ سۇراعان ەدىك.

«حالىقتىڭ الاڭداۋىنا، ءسىزدىڭ الاڭداۋىڭىزعا نەگىز جوق. ءبىرىنشى كەزەكتە ەشبىر قوس بيلىك بۇگىندە جوق. ول بولۋى مۇمكىن ەمەس. بۇگىندە بارلىق شەشىمدەردى حالىق باسىم كوپشىلىكپەن سايلاعان مەملەكەت باسشىسى قاسىم-جومارت كەمەل ۇلى توقايەۆ قابىلداپ وتىر. ساۋالىڭىزعا كەلەر بولساق، ەكس- پرەزيدەنت بۇگىندە مەملەكەتتىك ماسەلەلەرگە، ىستەرگە ەشبىر ارالاسپايدى. ەكىنشىدەن، ءوزىنىڭ كەزدەسۋلەرى نەمەسە وتكىزىپ جاتقان ءىس-شارالارى، جۇرگەن جول ساپارلارى - ونىڭ بارلىعى جەكە ازامات رەتىندە قۇقىعىن پايدالانىپ جۇرگەندىگى»، - دەپ جاۋاپ بەردى ەرلان قوشانوۆ.

اۆتور

مارلان جيەمباي