ەلىمىزدە جاستارعا ەنەرگەتيكالىق سۋسىنداردى ساتۋعا تىيىم سالىنباق

Газды сусын
Фото: Pyxabay.com

استانا. KAZINFORM - بۇگىن سەناتتىڭ جالپى وتىرىسىندا دەپۋتاتتار ەنەرگەتيكالىق سۋسىنداردى ساتۋدى 21 جاسقا دەيىن شەكتەۋ ماسەلەسىن كوتەردى.

«ۇلت قاۋىپسىزدىگىنىڭ نەگىزگى ستراتەگياسىنىڭ ءبىرى - ۇلت دەنساۋلىعى. وسكەلەڭ ۇرپاقتىڭ دەنساۋلىعى - ۇلت بولاشاعى. بۇگىن سەناتتا قارالعان زاڭدى وسىعان دەيىن تالقىلاۋ بارىسىندا دەپۋتاتتار بالالار مەن جاسوسپىرىمدەرگە ەنەرگەتيكالىق سۋسىنداردى ساتۋدى 21 جاسقا دەيىن شەكتەۋگە جانە زاڭدى قاتاڭداتۋعا قاتىستى ۇسىنىستار بولدى. سەبەبى، ەنەرگەتيكالىق سۋسىندار جۇرەك-قان تامىرلارى، قانت ديابەتى، بۇيرەك، جۇيكە تامىرلارى اۋىرلارىنا الىپ كەلەدى. جۇكتى ايەلدەرگە دە كەرى اسەر ەتەدى. ادامدا قورقىنىش، ۇرەي پايدا بولادى. پسيحولوگيالىق جانە فيزيكالىق تاۋەلدىلىككە الىپ كەلەدى. ءبىز ۇسىنعان تۇزەتۋلەر بەلگىلى ءبىر دارەجەدە بيزنەستى شەكتەيتىن تۇسىنەمىز. الايدا، بالالارىمىزدىڭ دەنساۋلىعى كەز كەلگەن تريلليونداعان قارجىدان قىمبات ەكەنىن ەستەرىڭىزگە سالعىم كەلەدى. نەگە ۇكىمەت پارلامەنت دەپۋتاتتارىنىڭ باستاماسىن قولداپ، بۇگىنگە دەيىن وسى ماسەلەنىڭ قورىتىندىسىن بەرمەدى؟ وسى ماسەلە بويىنشا ناقتى ۇسىنىمداردى بىلگىمىز كەلەدى. بۇل ماسەلە قانداي مەرزىمدە، قانداي زاڭ جوباسى اياسىندا ءوزىنىڭ زاڭنامالىق شەشىمىن تابادى؟»، - دەپ سۇرادى سەناتور عاليسقار سارىبايەۆ.

ءوز كەزەگىندە دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ اتالعان ماسەلە بويىنشا ءتيىستى جۇمىس باستالعانىن ايتتى.

«قازىر 21 جاسقا دەيىن جاسوسپىرىمدەر مەن بالالارعا ەنەرگەتيكالىق سۋسىنداردى ساتۋعا تىيىم سالۋ بويىنشا ارۆ (اناليز رەگۋلياتورنوگو ۆوزدەيستۆيا - رەتتەۋشىلىك اسەردى تالداۋ) دايىندالعان. ول ۇكىمەتارالىق كوميسسيادا ماقۇلدانعان. قازىر ۇكىمەت قورىتىندىسىنىڭ جوباسى دايىن. بارلىق ورتالىق مەملەكەتتىك ورگاندارمەن كەلىسىلگەن. قازىر ىشكى ىستەر مينيسترلىگىمەن كەلىسۋ عانا قالدى. سونىمەن قاتار، باسقا نورمالار بويىنشا ۆەندينگتىك اپپاراتتاردا وسى ءونىمدى ساتۋ نەمەسە جارنامالارعا تىيىم سالۋ بويىنشا ارۆ (اناليز رەگۋلياتورنوگو ۆوزدەيستۆيا) ماسەلەسى بويىنشا جۇمىس جالعاسىپ جاتىر. ءبىزدىڭ ويىمىزشا، ماجىلىستەگى «لۋدونومانيا تۋرالى» زاڭناماعا وسى نورمالاردى ەنگىزەمىز»، - دەدى ۆيتسە-مينيستر.

ەسكە سالساق، بىلتىر كۇزدە بۇرىنعى دەنساۋلىق ساقتاۋ ءمينيسترى اجار عينيات ەلىمىزدە 21 جاسقا دەيىنگى جاستارعا ەنەرگەتيكالىق سۋسىنداردى ساتۋعا تىيىم سالۋ ماسەلەسى پىسىقتالىپ جاتقانىن ايتتى.

اۆتور

رۋسلان عابباسوۆ

سوڭعى جاڭالىقتار