ەلىمىزدە ۋاقتىلى جاڭارتىلماعان بازار يەلەرىنە ايىپپۇل سالىنادى

استانا. KAZINFORM - كەلەر جىلدان باستاپ بازاردى جاڭارتۋعا قاتىستى ۇسىنىم مەن ەسكەرتۋلەردى ەلەمەگەن بازار يەلەرىنە ايىپپۇل سالىنا باستايدى. بۇل تۋرالى ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ابىلدابەكوۆ ءمالىم ەتتى.

- بازارلاردى جاڭعىرتۋ جۇمىسى الدىمەن بيزنەستىڭ الەۋمەتتىك جاۋاپكەرشىلىگى ەكەنىن ەسكەرۋ قاجەت. جاڭارتۋ تەك ساتىپ الۋشىلار ءۇشىن عانا ەمەس، ساتۋشىلار ءۇشىن دە قولايلى جانە قاۋىپسىز جاعداي جاسايدى. جەرگىلىكتى اكىمدىكتەر مەن اۋماقتىق ساۋدا دەپارتامەنتتەرى جاڭعىرتۋدى ۋاقتىلى ءارى ساپالى جۇرگىزۋ جانە جاڭعىرتۋعا كەدەرگى كەلتىرەتىن پروبلەمالاردى جويۋ بويىنشا جۇمىستى كۇشەيتۋى قاجەت، - دەدى ايدار ابىلدابەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

وسى ورايدا ساۋدا كوميتەتىنىڭ باسشىسى بازار يەلەرىنە جاۋاپكەرشىلىك جۇكتەلەتىنىن ايتتى.

- 2026 -جىلعى 1-قاڭتاردان باستاپ اكىمشىلىك قۇقىق بۇزۋشىلىق تۋرالى زاڭناماعا سايكەس، بازاردى بەلگىلەنگەن مەرزىمدە جاڭعىرتۋدى قامتاماسىز ەتپەگەن ساۋدا بازارلارىنىڭ يەلەرىن اكىمشىلىك جاۋاپكەرشىلىككە تارتۋ جوسپارلانىپ وتىر، - دەيدى ول.

سونداي-اق، سپيكەر الدىمەن بازار يەلەرىنە ەسكەرتۋ جاسالىپ، ۇسىنىم بەرىلەتىنىن ايتتى، ەگەر ەسكەرتۋ ەلەنبەگەن جاعدايدا 300 ا ە ك (1179600 تەڭگە) كولەمىندە ايىپپۇل سالىنادى. ماسەلە ايىپپۇلمەن شەشىلمەگەن جاعدايدا ءىس سوتقا جىبەرىلەدى.

ايتا كەتەيىك، بيىل ەلىمىزدە 100 بازار جاڭارتىلادى. الدىمەن ساۋدا جانە ينتەگراتسيا مينيسترلىگىنىڭ وكىلدەرى بارلىق بازاردى ارالاپ، تەكسەرىپ شىعادى.

ەسكە سالا كەتسەك، جىل باسىندا ۇكىمەت باسشىسى بۇكىل ساۋدا قىزمەتىن، ونىڭ ىشىندە بازارلار مەن ءۇي ماڭىنداعى شاعىن دۇكەندەردىڭ قىزمەتىن سيفرلاندىرۋ بويىنشا ناقتى ۇسىنىستار مەن شارالار ازىرلەۋ كەرەكتىگىن ايتقان ەدى.

اۆتور

داۋلەت ىزتىلەۋ