ەلىمىزگە قىتاي مەن ءۇندىستاننان كەلەتىن تۋريستەر كوبەيگەن
استانا. KAZINFORM - قازاقستانعا قىتاي مەن ءۇندىستاننان كەلەتىن تۋريستەر سانى ارتقان. ونىڭ سەبەبىن تۋريزم جانە سپورت ءمينيسترى ەرمەك مارجىقپايەۆ ءتۇسىندىردى.
«ەلدىڭ حالىقارالىق اشىقتىعى شەتەلدىك تۋريستەردىڭ وسۋىنە وڭ اسەر ەتەدى. قازاقستان 82 ەلمەن ۆيزاسىز رەجيمدە قارىم-قاتىناستا. سونىڭ ىشىندە قىتاي، ءۇندىستان سياقتى تۋريستىك نارىعى ءىرى ەلدەر بار. ءبىز بۇل ەلدەردەن كەلۋشىلەردىڭ ايتارلىقتاي وسكەنىن كورىپ وتىرمىز»، - دەدى ەرمەك مارجىقپايەۆ ۆەدومستۆونىڭ كەڭەيتىلگەن القا وتىرىسىندا.
مينيستر كەلتىرگەن مالىمەتكە سايكەس، 2022-جىلعى شىلدەدە قىتاي ازاماتتارى ءۇشىن 14 كۇندىك ۆيزاسىز رەجيمدى ەنگىزۋدىڭ جانە 2023-جىلعى قاراشادان باستاپ ەكىجاقتى ۆيزاسىز رەجيمنىڭ ارقاسىندا اتالعان ەلدەن كەلۋشىلەر سانى 18 مىڭنان 217 مىڭعا، ياعني 12 ەسە ۇلعايعان.
ءۇندىستان بويىنشا 14 كۇندىك ۆيزاسىز رەجيم ەنگىزىلگەننەن كەيىن ول ەلدەن كەلەتىن تۋريستەر ءۇش ەسە وسكەن. اتاپ ايتقاندا، 2022-جىلى 28 مىڭ ادام، 2023-جىلى 78 مىڭ تۋريست كەلگەن.
اۆتور
داۋلەت ىزتىلەۋ
