ەلوردادا 14 مىڭ ادام اپاتتى ۇيدە تۇرىپ جاتىر - استانا اكىمى

استانا. KAZINFORM - استانادا اپاتتى تۇرعىن ۇيلەردى بۇزۋ جۇمىستارى 2028 -جىلعا دەيىن اياقتالۋى ءتيىس. بۇل تۋرالى ەلوردا اكىمى جەڭىس قاسىمبەك ءمالىم ەتتى.

«رەنوۆاتسيا بويىنشا ۇلكەن جوسپار بار. قالادا كوپتەگەن ەسكى جانە اپاتتىق جاعدايداعى تۇرعىن ۇيلەر بار. قازىر اپاتتى تۇرعىن ۇيدە تۇراتىن 14 مىڭعا جۋىق پاتەر يەلەرى بار. اپاتتى تۇرعىن ۇيلەردى بۇزۋ جانە جاڭا باسپانا بەرۋ ماسەلەسىن 2028-2029 -جىلعا دەيىن تولىعىمەن شەشۋىمىز كەرەك. ەگەر بۇرىن 250-گە جۋىق تۇرعىن ءۇيدى ءسۇرىپ، جاڭا پاتەرلەر بەرسەك، بيىل اپاتتى جاعدايداعى تۇرعىن ۇيلەردىڭ ورنىنا 700 پاتەر بەرەمىز. كەلەسى جىلى بۇل كورسەتكىشتى 1000 پاتەرگە دەيىن كوتەرۋدى جوسپارلاپ وتىرمىز»، - دەدى جەڭىس قاسىمبەك قالانىڭ بيزنەس قاۋىمداستىعى وكىلدەرىمەن كەزدەسۋى بارىسىندا.

اكىمنىڭ سوزىنشە، اپاتتى تۇرعىن ۇيلەردىڭ سانى رەسمي دەرەكتەن الدەقايدا كوپ جانە ولاردى بۇزۋ جۇمىستارى 2028 -جىلعا دەيىن اياقتالۋى ءتيىس.

«ودان بولەك، ەسكى تۇرعىن ۇيلەر دە جەتكىلىكتى. سونىمەن قاتار، تۇرعىن ءۇي ەمەس، گاراجدار، ساياجايلار سياقتى ءۇي-جايلار بار. ءتىپتى قالا ورتالىعىندا ب. مومىش ۇلىنىڭ بويىندا مىڭجىلدىق اللەياسىنا قاراي، حان شاتىردىڭ ارتىندا بۇزۋعا جاتاتىن تاعى بىرنەشە ءۇي بار»، - دەپ تولىقتىردى استانا اكىمى.

بۇعان دەيىن جەڭىس قاسىمبەك ەلوردادا تۇرعىن ءۇي سالۋدى ۋاقىتشا شەكتەۋگە قاتىستى تۇسىنىك بەرگەن ەدى.

اۆتور

داۋلەت ىزتىلەۋ