ۇلتتىق قور مەن سىرتتان قارىز الۋ ءوسىپ كەلەدى - ەرلان قوشانوۆ

استانا. KAZINFORM - ەندى ءماجىلىس مەملەكەتتىك ورگانداردىڭ عانا ەمەس، كۆازيمەملەكەتتىك سەكتور مەن بيۋدجەتتەن تىس قورلاردىڭ دا شىعىسى مەن فيسكالدىق مىندەتتەمەسىن تولىق كورىپ وتىرادى. بۇل تۋرالى ءماجىلىس ءتوراعاسى ەرلان قوشانوۆ ءمالىم ەتتى.

- بيىل وكىنىشكە قاراي بيۋدجەتتىڭ كىرىس بولىگىن جوسپارلاۋ مەن ورىنداۋدا كەتكەن كەمشىلىكتەرگە بايلانىستى ماسەلە بار. سونىڭ سالدارىنان ۇلتتىق قوردان قاراجات الۋ مەن سىرتتان قارىز الۋ كولەمى ارتىپ كەلەدى. دەپۋتاتتاردىڭ بۇل الاڭداۋشىلىعى ورىندى دەپ سانايمىن. ءتيىستى مەملەكەتتىك ورگاندار اتالعان ماسەلە بويىنشا قورىتىندى جاسالۋلارى كەرەك. جوعارىداعى سىن-ەسكەرتپەلەردىڭ ءبىرازى بۇرىننان ايتىلىپ ءجۇر. بۇل - جۇيەلى پروبلەما. ولار جۇيەلى شەشىمدى قاجەت ەتەدى. ارينە، سىناۋ دا كەرەك. ءبىراق، وسى ماسەلەلەردىڭ قالاي شەشىلىپ جاتقانى تۋرالى دا بۇگىن ايتۋىمىز كەرەك دەپ ويلايمىن، - دەدى ەرلان قوشانوۆ ءماجىلىستىڭ جالپى وتىرىسىندا.

ءماجىلىس سپيكەرىنىڭ مالىمدەۋىنشە، دەپۋتاتتار اتالعان ماسەلەنى زاڭنامالىق دەڭگەيدە شەشۋ ءۇشىن جىل بويى بەلسەنە جۇمىس ىستەدى.

- مەملەكەت باسشىسىنىڭ تاپسىرماسىمەن جاڭا بيۋدجەت كودەكسى ازىرلەندى. وندا بۇرىننان كەلە جاتقان تۇيتكىلدەردىڭ دەنى ەسكەرىلگەن. وسىلايشا، جاڭا بيۋدجەت كودەكسى بۇرىنعى مودەلدىڭ ولقى تۇستارىن - بولشەكتەنۋدى، جارياسىزدىقتى جانە باقىلاۋدىڭ السىزدىگىن جويۋعا باعىتتالعان. ەندى ءبىز، دەپۋتاتتار مەملەكەتتىك ورگانداردىڭ عانا ەمەس، كۆازيمەملەكەتتىك سەكتور مەن بيۋدجەتتەن تىس قورلاردىڭ دا شىعىستارى مەن فيسكالدىق مىندەتتەمەسىن تولىق كورىپ وتىرامىز. بۇكىل بيۋدجەت پروتسەسى سيفرلاندىرىلىپ، اشىق بولادى. قارجىلىق ءتارتىپ كۇشەيە تۇسەدى، - دەپ مالىمدەدى ءتوراعا.

بۇعان دەيىن ۇلتتىق بانك نەگە حالىققا ۇلتتىق قوردى باسقارۋ كورسەتكىشتەرى تۋرالى اشىق ەسەپ بەرمەي وتىرعانى تۋرالى جازعان ەدىك.

اۆتور

داۋلەت ىزتىلەۋ